Затрыманы яшчэ адзін ўдзельнік разбойнага нападу на жанчыну ў Гомелі
Затрыманы яшчэ адзін удзельнік разбойнага нападу на жанчыну ў Гомелі. Як паведамляе прэс-служба МУС у сваім Тэлеграм-канале, трэці фігурант справы затрыманы ў Мінску на арандаванай кватэры ў доме па вуліцы Максіма Багдановіча. Гэта беспрацоўны 18-гадовы гамяльчанін.
Пасля здзяйснення нападу ён з’ехаў у Расію і хаваўся там у сваякоў, аднак неўзабаве прыехаў у Мінск разам з маці. Яны здымалі кватэры на суткі і штодня іх мянялі.
Падчас агляду часовага месца жыхарства канфіскаваныя долары ЗША. Хлопца змясцілі ў сталічны СІЗА-1.
Позна ўвечары 2 верасня ў Гомелі па вуліцы Быхаўскай невядомыя збілі жанчыну, запхнулі яе ў белы БМВ і зніклі. Аўтамабіль пазней знайшлі на вуліцы Севастопальскай. За рулём была жанчына, якой і належыць машына. Пацярпелая была моцна збітая і яе даставілі ў лякарню, аднак яна здолела паведаміць міліцыі прыкметы злачынцаў.
Як высветлілася, на яе напалі трое хлопцаў у двары дома. Пачалі збіваць і патрабавалі аддаць ім грошы. Затым запхнулі ў машыну і вывезлі ў лес. У багажніку маладыя людзі знайшлі 5 тысяч долараў і накіраваліся назад у Гомель. У дварах яны ўпёрліся ў тупік, кінулі пацярпелую ў машыне і зніклі.
Першага падазраванага, 17-гадовага гамяльчаніна, затрымалі адразу. На наступны дзень знайшлі яшчэ аднаго нападніка — ён паспеў набыць сабе машыну і збіраўся выехаць з горада. Цяпер затрымалі і трэцяга рабаўніка.
