Затрыманага магілеўскага блогера перавялі ў СІЗА
Алесь Сабалеўскі / facebook.com
Затрыманага магілеўскага блогера Алеся Сабалеўскага перавялі ў СІЗА. Гэта можа азначаць, што супраць яго выстаўлена крымінальнае абвінавачванне, піша БАЖ.
Па звестках знаёмых Сабалеўскага, у магілёўскі следчы ізалятар ён трапіў на мінулым тыдні. Раней яго ўтрымлівалі ў ІЧУ паводле судовых рашэнняў — былі два адміністрацыйныя арышты запар.
Алеся Сабалеўскага затрымалі на працы раніцай 12 снежня і спачатку арыштавалі на 10 сутак "за распаўсюд экстрэмісцкіх матэрыялаў".
Праваабаронцы мяркуюць, што ў выпадку завядзення супраць Сабалеўскага крымінальнай справы, яна можа быць звязаная з прызнаннем "экстрэмісцкімі фарміраваннямі" шэрагу рэгіянальных медыярэсурсаў, а таксама іх шматлікіх акаўнтаў у сацсетках і месенджарах.
Алесь Сабалеўскі даўно адышоў ад заняткаў журналістыкай. Ужо некалькі гадоў ён працаваў у адным з магілёўскіх пунктаў пракату.
