“Зарэгістраваныя чатыры выпадкі”. У Салігорску людзей шпіталізуюць з адром

“Зарэгістраваныя чатыры выпадкі”. У Салігорску людзей шпіталізуюць з адром

Жыхароў Салігорска масава абследуюць на адзёр. За апошні час у горадзе выяўленыя чатыры выпадкі гэтай хваробы. Тэлефанаванні з паліклінік з прапановамі прайсці медагляд правакуюць розныя чуткі і ажыятаж. Апроч таго, з “Беларуськалія” на абследаванне забралі каля сто чалавек. Еўрарадыё разбіраецца, ці сапраўды ў Салігорску ёсць падставы для панікі з-за адру, альбо жыхарам нічога не пагражае.

“Праблема ёсць на самой справе, — распавяла Еўрарадыё жыхарка Салігорска. — Але і чуткі могуць быць перабольшанымі. Наконт колькасці хворых я не валодаю дакладнай інфармацыяй, але магу сказаць, што адзін са сваякоў знаходзіцца ў бальніцы з адром”.

Па словах салігарчан, на мінулым тыдні з “Белкалію” на абследаванне адправілі каля ста чалавек. У Салігорскай цэнтральнай раённай бальніцы кажуць, што выпадкі хваробы сапраўды зафіксаваныя, але не трэба ствараць паніку.

“У горадзе зарэгістраваныя чатары выпадкі, яны пацверджаныя, — расказалі Еўрарадыё ў бальніцы. — Сёння [18 студзеня. — Еўрарадыё] выпісаныя дзве апошнія жанчыны. Па кожным выпадку праводзіцца дастаткова сур’ёзнае эпідрасследаванне, пры неабходнасці робіцца вакцынацыя. Напэўна, з-за таго, што працуюць з кантактамі па месцы жыхарства, працы, ўзнік ажыятаж. Эпідэміі няма. Адзёр ёсць у Расіі, ва Украіне, Еўропе. Мы працуем, адпачываем, лётаем, таму рызыка прывезці адзёр ёсць заўсёды”.

Дакладна вызначыць, адкуль у Салігорск трапіў вірус, па словах спецыялістаў, немагчыма. Верагодна, у горад хваробу завезла салігарчанка, якая нядаўна вярнулася з Украіны.

Тым часам у Грузіі — эпідэмічная ўспышка адру. Паводле JAMnews за 17 дзён новага года зафіксаваны 321 выпадак інфекцыі.

"Адзёр ў асноўным ахапіў узроставую групу ад 20 да 40 гадоў. 56-58% інфіцыраваных адносяцца менавіта да гэтай групы. Што тычыцца астатніх узроставых груп, восем адсоткаў інфіцыраваных ад 0 да аднаго года, а 14 адсоткаў — ад года да пяці гадоў", — кажа кіраўнік Нацыянальнага цэнтру кантроля захворванняў Аміран Гамкрэлідзэ у інтэрв'ю "Нетгазети".

Гэтыя паказчыкі растуць, бо значная частка насельніцтва ўсё яшчэ не прышчэпленая. Адзінае, што можа спыніць адзёр, гэта вакцынацыя гэтых людзей.

Апошнія навіны

Галоўнае

Выбар рэдакцыі