Захад павінен адказаць мовай, якая зразумелая Лукашэнку — Джулі Фішэр
![Джулі Фішэр / belsat.eu](/sites/default/files/styles/gallery_main/public/2023-08/fisher_31_05_4.jpg.webp?itok=RwcPKEyv)
Джулі Фішэр / belsat.eu
ЗША будуць каардынаваць свае крокі ў дачыненні да Беларусі з еўрапейскімі партнёрамі, але адэкватны адказ на інцыдэнт з Ryanair будзе, заявіла прызначаны амбасадар ЗША ў Беларусі Джулі Фішэр у інтэрв'ю тэлеканалу "Белсат".
"Відавочна, што Захад павінен адказаць мовай, якую Лукашэнка здольны зразумець: мы не пацярпім такога кшталту дзеянняў, мы не пацярпім, каб яго інструменты рэпрэсій былі разгорнутыя ў Еўропе і за межамі Беларусі", — сказала дыпламат.
Яна падкрэсліла, што рэпрэсіі, якія практыкуюць беларускія ўлады ў дачыненні да апанентаў, непрымальныя і ўнутры краіны. Таму ЗША пераглядае спосабы ўзаемадзеяння з Беларуссю — "інструментамі, якімі маем", сказала Фішэр.
ЗША па-ранейшаму настроеныя падтрымліваць народ Беларусі, але цяпер будуць і рэагаваць на новую тактыку Лукашэнкі. Пры гэтым дыпламат прызнала, што ў цяперашніх умовах дапамагчы разрадзіць сітуацыю магла б Расія – у яе з'явілася "магчымасць адыграць канструктыўную ролю. І мы спадзяемся, што яны змогуць гэта зрабіць", адзначыла дыпламат.
На думку Фішэр, у беларускіх уладаў па-ранейшаму застаецца магчымасць пайсці на дыялог з грамадствам. Яна лічыць, што "ніколі не позна лідару пачаць клапаціцца пра дабрабыт свайго народа".
"Не позна вырашыць, што абавязанні, якія былі ўзятыя што да да правоў чалавека ў краіне, могуць быць выкананыя. Яшчэ не позна вызваліць Рамана Пратасевіча і Сафію Сапегу. Яшчэ не позна вызваліць 400 палітычных зняволеных", — сказала Джулі Фішэр.
![Запад должен ответить языком, который понятен Лукашенко — Джули Фишер](/sites/default/files/paragraphs/image/fisher31052.jpg)
Прызначаны амбасадар ЗША ў Беларусі Джулі Фішэр яшчэ ў красавіку заяўляла, што гатовая прыступіць да выканання сваіх абавязкаў у Мінску, але не можа атрымаць візу.
Напярэдадні ў інтэрв'ю расійскаму выданню "Коммерсант" беларускі міністр замежных спраў Уладзімір Макей крытычна выказаўся аб актыўнасці амерыканскага дыпламата. "Яна сустрэлася з усімі, зрабіла вялізную колькасць негатыўных заяваў у дачыненні да Беларусі і яе кіраўніцтва, і пасля гэтага яна чакае, каб мы прынялі яе з распасцёртымі абдымкамі?" — сказаў Макей.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.