Загадам на загад: студэнты МДЛУ адрэагавалі на забарону акцый салідарнасці
"Пагоня" на загадзе / Еўрарадыё
Студэнты лічаць, што рэктарка перагнула палку.
24 верасня рэктарка МДЛУ Наталля Баранава падпісала загад па ўніверсітэце, які мусіць утрымаць студэнтаў ад акцый салідарнасці. На тэрыторыі ўніверсітэта забараняюцца "несанкцыянаваныя масавыя мерапрыемствы", а адміністрацыю і выкладчыкаў заклікаюць звярнуць увагу "на неабходнасць няўхільнага захавання працоўнай дысцыпліны і сваіх працоўных абавязкаў".
Раніцай наступнага дня на інфармацыйным стэндзе з'явіўся яшчэ адзін загад, але цяпер ужо ад імя студэнтаў. Яны патрабуюць дазволіць правядзенне мірных масавых мерапрыемстваў ва ўніверсітэце і настойваюць на спыненні ціску на акадэмічную супольнасць. У шапцы загаду — герб “Пагоня”.
— Рэктарка перагнула палку. Мы не гатовыя мірыцца з тым, што нам забараняюць ва ўніверсітэце літаральна ўсё, — распавядае Еўрарадыё на ўмовах ананімнасці студэнтка МДЛУ, незадаволеная стаўленнем адміністрацыі да пратэстаў. — Дагэтуль мы спрабавалі выбудаваць нейкі дыялог паміж адміністрацыяй і намі. Мы пасылалі звароты, петыцыі, а нам на гэта адказалі загадам па забароне ўсяго. Таму мы вырашылі выдаць свой загад са сваімі правіламі.
Еўрарадыё: Чаго дамагаюцца студэнты МДЛУ?
Студэнтка МДЛУ: Нашы патрабаванні — мы хочам, каб у нас была прастора ўніверсітэта, на якой мы можам выказваць сваю кропку гледжання. Мы хочам дыялогу з адміністрацыяй. І, вядома, агульнапалітычныя патрабаванні, якія цяпер аднолькавыя на ўсіх стачкамах і прадпрыемствах: сумленныя выбары, скарачэнне гвалту.
Еўрарадыё: Які працэнт сярод студэнтаў тых, хто за перамены, і тых, хто супраць?
Студэнтка МДЛУ: Вядома, не ўсе сем тысяч студэнтаў кожны дзень выходзяць на акцыі. Актыў у нас не такі вялікі, як хацелася б. Але мы ведаем, што людзі, якія не з актыву, нас падтрымліваюць. Многія кожны дзень у 12.35 выходзяць на ганак галоўнага корпуса і так праяўляюць сваю пазіцыю.
Еўрарадыё: Як адрэагавала на ваш "загад" адміністрацыя?
Студэнтка МДЛУ: Да нас прыходзяць перыядычна на парах, на лекцыях, зачытваюць розныя дакументы, кажуць аб нашай адказнасці. Сёння ва ўніверсітэце зачыталі загад рэктаркі, а ў некаторых навучальных групах нават дадалі, што калі мы не паслухаемся, то будуць карныя меры. Выказаць здагадку, як на гэта адрэагуе адміністрацыя, нескладана. Але мы зараз у такім становішчы, што не асабліва баімся наступстваў — усіх немагчыма адлічыць, нас занадта шмат.
Еўрарадыё: МДЛУ варыцца ў сваім пратэсце ці ёсць сувязь з іншымі ўніверсітэтамі?
Студэнтка МДЛУ: Безумоўна. Мы, актывісты з розных універсітэтаў, маем зносіны паміж сабой, абмяркоўваем планы, часам нават плануем сумесныя акцыі і проста каласальна адзін аднаго падтрымліваем — гэта вельмі дадае сіл.
Пакуль мы адзіныя, мы непераможныя. Я думаю, што кожны студэнт ва ўніверсітэце зараз адчувае, што ён не адзін і што баяцца, у прынцыпе, няма чаго. Мы абавязаныя абараняць свае правы, правы грамадзян, правы чалавека. Іншага выбару ў нас цяпер няма.
Выкладчыкі нас падтрымліваюць, яны выходзяць з намі на акцыі. Не ўсе выкладчыкі, але іх шмат. Я ведаю, што ў некаторых універсітэтах няма наогул нічога.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.