За выкарыстанне дзяцей порнамагнат плаціў іх маці ежай і грашыма

Следчым камітэтам завершана расследаванне ў дачыненні да 40-гадовага мужчыны і дзвюх жанчын, якія абвінавачваюцца ў гандлі дзецьмі з мэтай сексуальнай эксплуатацыі.

Як высветліла следства, летам 2015 года мужчына пазнаёміўся з дзвюма жанчынамі і іх дочкамі 2011 і 2013 гадоў нараджэння. Ужо налета абвінавачаны прапанаваў жанчынам за плату даваць сваіх дзяцей для вырабу парнаграфіі. Маці дзяўчатак пагадзіліся, за "карыстанне" дзецьмі жанчынам плацілі грашыма і ежай. Знятая парнаграфія размяшчалася мужчынам на сайтах.

Маці малалетніх дзяўчатак прад'яўлена абвінавачанне ў гандлі людзьмі, а таксама дапамаганні ў згвалтаванні, здзяйсненні іншых дзеянняў сексуальнага характару і вырабе парнаграфічных матэрыялаў, якія змяшчаюць выявы непаўналетнiх. Да трох абвінавачваных прыменена мера стрымання ў выглядзе заключэння пад варту.

Таксама вядома, што мужчына займаўся сутэнёрствам. У чэрвені 2016 года абвінавачваны прапанаваў непаўналетніх дзяўчатак жыхару адной з блізкаўсходніх дзяржаў для секс-паслуг і стварэння парнаролікаў. Жыхар блізкаўсходняй дзяржавы абвешчаны ў міжнародны вышук па лініі Інтэрпола.

Плацілі мужчыну пры дапамозе крыптавалюты. Пры ўзаемадзеянні з супрацоўнікамі Інтэрпола ўстаноўлена, што парнаграфія прадавалася карыстальнікам з Германіі, Іспаніі, Расіі і дзяржаў Блізкага Усходу.

Усяго ў перыяд з 2015 да 2018 года мужчынам выраблена некалькі дзясяткаў парнаролікаў з удзелам дзяцей.

Было ўстаноўлена, што абвінавачваны таксама датычны да здзяйснення злачынстваў супраць палавой недатыкальнасці ў дачыненні да трох непаўналетніх дзяўчатак. У ходзе інтэрнэт-перапісак ён неаднаразова схіляў непаўналетніх да стварэння порнаматэрыялаў. Пасля чаго прадаваў гэта на розных сайтах.

Па выніках расследавання ўстаноўлены 31 факт супрацьпраўнай дзейнасці мужчыны, яму прад'яўлена абвінавачанне па сямі артыкулах Крымінальнага кодэкса Рэспублікі Беларусь:

ч. 3 арт. 166 (згвалтаванне, здзейсненае групай асоб, асобай, якая раней здзейсніла дзеянні, прадугледжаныя артыкулам 167 КК);

ч. 3 арт. 167 (здзяйсненне іншых дзеянняў сексуальнага характару, здзейсненых насуперак волі пацярпелай, з выкарыстаннем бездапаможнага стану пацярпелай, у дачыненні да заведама малалетняй);

ч. 1 арт. 169 (распусныя дзеянні, здзейсненыя асобай, якая дасягнула васямнаццацiгадовага ўзросту, у адносiнах да асобы, якая заведама не дасягнула шаснаццацігадовага ўзросту, пры адсутнасці прыкмет злачынстваў, прадугледжаных артыкуламі 166, 167 і 168);

ч. 3 арт. 181 (гандаль людзьмі, здзейснены ў дачыненні да дзвюх асоб з карыслівых меркаванняў);

ч. 1 арт. 328 (незаконныя без мэты збыту набыццё, перавозка і захоўванне наркатычных сродкаў);

ч. 2 арт. 343 (выраб, захоўванне з мэтай распаўсюджвання, распаўсюджванне і рэкламаванне парнаграфічных матэрыялаў, якія змяшчаюць выявы непаўналетнiх) (у рэд. КК РБ 2005 г.);

ч. 3 арт. 343-1 (выраб, захоўванне з мэтай распаўсюджвання, распаўсюджванне і рэкламаванне парнаграфічных матэрыялаў з выявай заведама непаўналетняга, здзейсненае асобай, якая раней здзяйсняла злачынства, прадугледжанае часткай 2 артыкула 343 Крымінальнага кодэкса Рэспублікі Беларусь).

Крымінальная справа перададзена пракурору для накіравання ў суд.