З-за моцнага ліўня ў Мінску і Гомелі часткова спыняўся грамадскі транспарт

Раніцай 18 ліпеня з-за моцнага ліўня ў Мінску і Гомелі на некаторых участках дарог утварыліся падтапленні. Часткова спыняўся грамадскі транспарт.

"Мінсктранс" паведамляе, што з-за падтаплення тралейбусы спыняліся на вуліцах Кальварыйскай, Адзінцова, Якубоўскага, Багдановіча, Славінскага, Кнорына, Каліноўскага. На Лагойскім тракце, вуліцах Каліноўскага, Казлова, Платонава спыняліся трамваі, а на вуліцах Валгаградскай, Арлоўскай, Карастаянавай, Каліноўскага, Кнорына, Старынаўскай і нават на ўчастку праспекта Незалежнасці — аўтобусы. У большасці выпадкаў да 10-й гадзіны рух аднавіўся.

Гарадскія ўлады Гомеля паведамляюць, што грамадскі транспарт спыняўся на вуліцы Барыкіна. Праблемы былі і ў шэрагу іншых месцаў, дзе выкарыстоўвалася спецтэхніка.