З Гродзенскага ўніверсітэта звольнілі гісторыка Святлану Сілаву
Святлана Сілава / фота з яе акаўнту на Фэйсбуку
З гродзенскага дзяржуніверсітэта звольнілі кандыдатку гістарычных навук, дацэнта Святлану Сілаву.
Як напісала ў Фэйсбуку сама Сілава, афіцыйнай прычынай звальнення назвалі адсутнасць на працоўным месцы больш за тры гадзіны. Адсутнасць была звязаная з яе затрыманнем.
Як распавядала Еўрарадыё, у кастрычніку навукоўцу затрымалі сілавікі. Ёй прысудзілі штраф паводле арт. 19.11 КаАП (Распаўсюд экстрэмісцкіх матэрыялаў).
Сілава — вядомы беларускі гісторык. На кафедры гісторыі Беларусі Гродзенскага ўніверсітэта яна працавала з 2000 года, была намесніцай загадчыка кафедры па вучэбнай рабоце. Яе навуковыя інтарэсы — гісторыя Праваслаўнай царквы ў Беларусі ў XVIII-XX стагоддзях.
