"Ён жа ішоў наўмысна забіваць людзей. Як кветкі на клумбе рэзаць"

Сваякі загінулай настаўніцы / Аляксей Карпека, Еўрарадыё
Сваякі загінулай настаўніцы / Аляксей Карпека, Еўрарадыё

У панядзелак, 19 жніўня, у Стоўбцах пачаўся суд над 16-гадовым падлеткам, які абвінавачваецца ў нападзе з нажом у лютым 2019 года на настаўніцу гісторыі і школьнікаў. У выніку нападу два чалавекі загінулі, яшчэ двое атрымалі раненні. Сваякі загінулай настаўніцы не хаваюць свайго абурэння з нагоды таго, што суд закрыты і што абвінавачванаму з прычыны ўзросту, па іх словах, пагражае занадта мяккае пакаранне. Карэспандэнт Еўрарадыё пагаварыў з сваякамі загінулай настаўніцы.

"Мы ўжо нічога не чакаем ад гэтага суда, — кажа муж загінулай настаўніцы. — Тое, што ён зрабіў, і пакаранне несуразмерныя. Ужо было сказана, што ён атрымае, нягледзячы на ​​артыкулы, ад 8 да 10 гадоў. Ці мала што яму 15 гадоў было, як забіваць — дык 15 гадоў нармальна. Вы думаеце, што восем гадоў выправяць гэтага чалавека?"

"Аб сапраўдных матывах мы нічога не ведаем, магчыма, на судзе нам нешта скажуць. Мы нават як сваякі не можам прысутнічаць на пасяджэнні, толькі калі прызнаюць пацярпелымі. Мы ўжо падалі хадайніцтва аб гэтым", — скардзіцца Алена, сястра Марыны Пархімовіч.

"Суд павінен быць адкрытым, каб іншым непанадна было"

"І чаму суд закрыты? Ён, наадварот, павінен быць адкрытым, каб іншым непанадна было такім падлеткам. У нашай мамы толькі адно пытанне: чаму мы не можам прысутнічаць? Значыць, пакрываюць. Пытанняў куча, адказаў няма.

Артыкулы ж яму прад'яўленыя што трэба, але калі б яму на той момант было 16 гадоў, то пагражала б яму пажыццёвае ці "вышка". А зараз што? Наймаць хіба для 15-гадовых кілера? Восем гадоў адсядзіць, вернецца ў росквіце сіл. І далей жыві. Для яго ж гэта забаўка была, ён жа ішоў наўмысна забіваць людзей. Як кветкі на клумбе рэзаць", —
дадае сын загінулай настаўніцы.

Як паведамляла Еўрарадыё, падлетку прад'яўленае абвінавачанне па трох артыкулах: забойства дзвюх асоб з асаблівай жорсткасцю з хуліганскіх меркаванняў (ч. 2 арт. 139); замах на забойства дзвюх асоб з асаблівай жорсткасцю з хуліганскіх меркаванняў (ч. 1 арт. 14, ч. 2 арт. 139); асабліва злоснае хуліганства (ч. 3 арт. 339 Крымінальнага кодэкса Рэспублікі Беларусь). Зараз яму 16 гадоў, а ў момант нападу было 15.

11 лютага 2019 года ў стаўбцоўскай школе № 2 вучань 10-га класа ўдарыў нажом настаўніцу гісторыі і грамадазнаўства і вучня 11-га класа, абое памерлі на месцы. Яшчэ двух чалавек абвінавачваны параніў.

Апошнія навіны

Галоўнае

Выбар рэдакцыі