Яцанюк: Штурму Майдана пакуль не будзе, абвешчана перамір'е
Украінская апазіцыя і прэзідэнт дамовіліся аб пачатку перамоўнага працэсу.
Штурму Майдана, які на гэту ноч планавала ўлада, не будзе, абвешчана перамір'е. Пра гэта паведаміў журналістам Арсеній Яцанюк па завяршэнні сустрэчы трох лідараў апазіцыі з прэзідэнтам Віктарам Януковічам, перадае "Украінская праўда".
"Ёсць пазітыўная навіна — штурм і зачыстка, якія планаваліся, адмененыя. Цяпер абвешчана перамір'е і пачатак перамоўнага працэсу для стабілізацыі сітуацыі", — заявіў Яцанюк.
Ён падкрэсліў, што ўлада планавала "увядзенне надзвычайнага становішча і начны штурм".
"Пасля сённяшняй сустрэчы мы можам дакладна сказаць — наш Майдан штурмаваць не будуць", — заявіў ён.
"Асноўнае — захаваць чалавечыя жыцці. Мы спынілі штурм і зачыстку", — запэўніў адзін з лідараў апазіцыі.
