Выбухі ў Крыме і чарговы "Рамштайн" — 267-я раніца вайны
![Вайна ва Украіне працягваецца амаль дзевяць месяцаў / facebook.com/GeneralStaff.ua](/sites/default/files/styles/gallery_main/public/2023-08/ukr_17_11.jpg.webp?itok=KuakNBhF)
Вайна ва Украіне працягваецца амаль дзевяць месяцаў / facebook.com/GeneralStaff.ua
У Джанкоі (гэта ў Крыме) напярэдадні ўвечары грымелі выбухі, паведамляе рэсурс "Суспільне" са спасылкай на мясцовых жыхароў. Пасля выбухаў у горадзе былі праблемы са святлом.
"Я чула гул у небе і некалькі выбухаў, цяжка сказаць, што гэта было і як побач. Дома знікла святло хвілін на дзесяць, потым з'явілася. Знаёмыя напісалі, што ў іх у горадзе святло міргала, але не знікала", — распавяла журналістам жыхарка Джанкоя. А ўкраінскі нардэп Юрый Мысягін ў гэты час апублікаваў у сетцы такі пост: "Памятайце, Крым становіцца ўсё больш небяспечны, і больш небяспечна знаходзіцца каля ваенных баз і гарнізонаў, аэрадромаў, нафтасховішчаў, ЦЭЦ і падстанцый".
З-за масіраванага расійскага ракетнага ўдару па Украіне 15 лістапада адключыліся некалькі атамных блокаў на Хмяльніцкай і Ровенскай АЭС, распавялі ў МАГАТЭ. На Хмяльніцкай АЭС былі пашкоджаныя чатыры лініі электраперадач. Праз гэта на станцыі спынілі два рэактары, а сама АЭС перайшла на дызельныя генератары. Пазней спецыялістам на станцыі ўдалося аднавіць знешняе электразабеспячэнне, дызель-генератары былі спыненыя. Але два блокі рэактара па-ранейшаму не працуюць. Акрамя таго, 15 лістапада Ровеннская АЭС страціла падключэнне да адной з ліній электраперадач. Адзін з чатырох яе блокаў аўтаматычна адключыўся. Гендырэктар МАГАТЭ Рафаэль Гросі кажа пра "вельмі трывожнае развіццё падзей", калі з рызыкамі бяспекі сутыкаюцца ўсе ядзерныя аб'екты Украіны, а не толькі захопленая ЗАЭС.
Прэзідэнт Украіны Уладзімір Зяленскі хоча, каб украінскія спецыялісты ўдзельнічалі ў міжнародным расследаванні інцыдэнту ў Польшчы. Нагадаем, падчас масіраванага абстрэлу Украіны 15 лістапада ў памежным польскім сяле адбыўся выбух, загінулі людзі. У самой Польшчы пакуль не бачаць прыкмет таго, што гэты выбух быў нападам і трэба актываваць 4-ы артыкул дамовы NATO (хоць гэты інструмент "трымаюць у руках"). Пра гэта напярэдадні гаварыў прэм'ер-міністр краіны Матэвуш Маравецкі. Па яго словах, гэта хутчэй быў няшчасны выпадак. Аб гэтым піша выданне Wiadomości.
Згодна з чацвёртым артыкула дамовы NATO, краіны-удзельніцы Альянса "будуць ажыццяўляць сумесныя кансультацыі кожны раз, калі, на думку любой з іх, тэрытарыяльная цэласнасьць, палітычная незалежнасьць або бясьпека любога з Бакоў будуць пастаўленыя пад пагрозу".
На фронце ў мінулыя суткі падраздзяленні сіл абароны Украіны адбівалі атакі расіян у Луганскай і Данецкай абласцях. Пра гэта гаворыцца ў ранішняй зводцы Генштаба УСУ.
У Злучаных Штатах мяркуюць, што Украіна мае добрыя поспехі і ў абароне, і ў наступе. А Расія праігрывае стратэгічна, аператыўна і тактычна. Пра гэта заявіў кіраўнік Аб'яднанага камітэта начальнікаў штабоў ЗША генерал Марк Мілі. Паводле яго ацэнкі, Расія не дасягнула "ніякай мэты" ў вайне супраць Украіны: не змагла "зрынуць" прэзідэнта Уладзіміра Зяленскага і ўрад Украіны; так і замацавала доступ да Чорнага мора; не здолела захапіць частку зямель, зрабіць паўзу і працягнуць наступ да Карпат.
"Рускія цярпелі няўдачу кожны раз. Праігрываюць стратэгічна, праігрываюць аператыўна і, паўтараю, праігрываюць тактычна [...] Стратэгічнае пераасэнсаванне іх мэтаў, іх незаконнага ўварвання пацярпела няўдачу, кожнае з іх", — заявіў Мілі. Ён лічыць, што Расія можа завяршыць гэтую вайну хоць сёння, але не хоча.
"Яны працягнуць гэтую барацьбу да зімы, наколькі мы можам сказаць. ЗША працягнуць падтрымліваць Украіну столькі, колькі спатрэбіцца", — падкрэсліў генерал.
![Взрывы в Крыму и очередной "Рамштайн" — 267-е утро войны](/sites/default/files/styles/default_image_paragraph/public/paragraphs/image/map_17_11.jpg.webp?itok=auBp6J4H)
Напярэдадні адбылося сёмае пасяджэнне кантактнай групы па пытаннях абароны Украіны (так званы фармат "Рамштайн"). Удзельнікі сустрэчы абмеркавалі новыя пакеты дапамогі. Падрабязнасці распавёў міністр абароны ЗША Лойд Осцін, які і склікаў гэтае пасяджэнне.
Так, Швецыя абавязалася выдзеліць пакет дапамогі на 287 мільёнаў даляраў, ён уключае сістэму СПА. Іспанія — даслаць яшчэ дзве пускавыя ўстаноўкі Hawk і ракеты. Канада — аказаць дапамогу на 500 мільёнаў долараў. Германія дапаможа Украіне з сістэмамі СПА, артылерыяй і боепрыпасамі для РСЗА. Грэцыя абвясціла аб перадачы боепрыпасаў калібра 155 мм, а Польшча — аб прадастаўленні артылерыі, боепрыпасы і СПА малой далёкасці.
"Мы збіраемся захаваць нашу дынаміку [дапамогі] на працягу зімы, каб Украіна магла працягваць кансалідаваць дасягненні і перахапіць ініцыятыву на поле бою. Украінскія войскі ваююць з яшчэ больш вялікай упартасцю і рашучасцю", — сказаў Осцін.
Тым часам, міністр унутраных спраў Украіны Дзяніс Манастырскі заявіў, што на вызваленай тэрыторыі Херсонскай вобласці праваахоўнікі выявілі 63 целы закатаваных людзей.
"Цяпер выявілі 63 целы на ўсёй тэрыторыі Херсоншчыны, але мы павінны разумець, што пошукі толькі пачаліся", — прыводзіць словы міністра Hromadske. На тэрыторыі вобласці ўкраінскія праваахоўнікі выявілі таксама 11 месцаў несвабоды, дзе расіяне ўтрымлівалі людзей. Па выніках выяўленных прыкмет ваенных злачынстваў у Херсонскай вобласці пачата ўжо 436 крымінальныя вытворчасці, распавёў Манастырскі.
А ў Жытоміры суд на 10 гадоў забараніў выкладчыку займацца выкладчыцкай дзейнасцю — ён падтрымліваў дзеянні Расіі і заклікаў жыхароў горада "падтрымаць дэнацыфікацыю Украіны". Пра гэта паведаміла Жытомірская абласная пракуратура. Было, у прыватнасці, устаноўлена, што
выкладчык на пасяджэнні адной з грамадскіх арганізацый заяўляў, што расіяне — "брацкі народ, а ўлады Расіі робяць усё, каб дапамагчы Украіне пазбавіцца ад неанацысцкіх фарміраванняў і аднавіць адносіны паміж нашымі краінамі". Выкладчыка прызналі вінаватым у падтрыманні рашэнняў і дзеянняў дзяржавы-агрэсара.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.