Вадзім Іосуб: Беларусь і Расія — на парозе чарговай “нафтавай вайны”
Беларусь і Расія стаяць на мяжы чарговага нафтавага канфлікту. І ўсё таму, што беларускія НПЗ адмаўляюцца перавозіць сваю прадукцыю, якую адпраўляюць на экспарт, па расійскай чыгунцы, а карыстаюцца паслугамі калег з краін Балтыі. Гэтае нежаданне можа прывесці да скарачэння паставак расійскай нафты ў Беларусь, мяркуе старшы аналітык “Альпары” Вадзім Іосуб.
Іосуб: “Тое, што можа быць цалкам спыненая пастаўка нафты, малаверагодна. Але сур’ёзныя скарачэнні аб’ёмаў паставак цалкам магчымыя. Не далей як летась мы былі сведкамі такіх дзеянняў Масквы і ведаем, што выкарыстоўвае нафтавы альбо газавы вентыль як сродак уціску расійскі бок не ўпершыню. Тут відавочны канфлікт інтарэсаў: гэта цікава расійскім перавозчыкам, але найхутчэй — не цікава беларускім вытворцам. Па гэтым пытанні будзе гандаль. Але ці выльецца ён у чарговую нафтаваю вайну, на гэтым этапе сказаць складана”.
Нагадаем, расійскія чыгуначнікі паскардзіліся Уладзіміру Пуціну, што нягледзячы на 50% зніжку для перавозкі прадуктаў нафтаперапрацоўкі, беларускія НПЗ адмаўляюцца карыстацца паслугамі расійскіх чыгуначнікаў і аддаюць перавагу балтыйскім. Спасылаючыся пры гэтым на доўгатэрміновыя кантракты. У адказ Пуцін прапанаваў аб’яднаць пастаўкі расійскай нафты ў Беларусь з дамовай на выкарыстанне беларускімі НПЗ расійскай чыгункі.
На думку Вадзіма Іосуба, такая пастаноўка пытання гучыць дзіўна, з улікам таго, што мы знаходзімся ў адзінай эканамічнай прасторы, але “пастаўкі тавараў унутры гэтай прасторы пачынаюць абумоўлівацца нейкімі рэчамі”. На думку эксперта, Беларусі трэба сур’ёзна падумаць над тым, каб шукаць сабе іншых пастаўшчыкоў нафты.
