Ва Украіне асуджаны беларус, які ваяваў у складзе ПВК "Вагнер" і трапіў у палон
Андрэй Герыловіч / t.me/Belarus_Files
Ва Украіне асуджаны беларус, які ваяваў у складзе ПВК "Вагнер" і трапіў у палон. Андрэй Герыловіч пайшоў на пагадненне аб прызнанні віны і пазбег максімальнага тэрміну (10 гадоў). За "ўдзел у якасці найміта ва ўзброеным канфлікце, ваенных або гвалтоўных дзеяннях" ён атрымаў 9 гадоў зняволення, паведамляе Радыё Свабода.
Крымінальную справу разглядаў адзін з судоў Данецкай вобласці Украіны. Тэрмін адбыцця пакарання будзе адлічвацца з 13 лютага 2023 года.
Нацгвардыя Украіны ўзяла ў палон 34-гадовага ўраджэнца Рэчыцкага раёна Гомельскай вобласці Андрэя Герыловіча (пазыўны "Заспа") у лістападзе 2022 года пад Бахмутам. У складзе ПВК "Вагнер" ён быў некалькі месяцаў, удзельнічаў у баях.
Яшчэ адзін беларус, Максім Зязюльчык, ваяваў ва Украіне ў шэрагах расійскай прыватнай ваеннай кампаніі "Рэдут", таксама трапіў у палон, быў асуджаны на 10 гадоў пазбаўлення волі. СБУ заявіла, што ён — супрацоўнік КДБ.
