Усаў: “Беларускі народ не з’яўляецца ворагам для літоўскага”

Літоўскі і беларускі сцягі / lrp.lt
Літоўскі і беларускі сцягі / lrp.lt

“Беларусы ніколі не дапамагалі рускім вынішчаць літоўскую дзяржаўнасць”. Пра гэта нагадвае палітолаг Павел Усаў, каментуючы Еўрарадыё намер урада Літвы прыпыніць выдачу грамадзянства і відаў на жыхарства беларусам.

“Наадварот, нават з канца 1980-х Зянон Станіслававіч і дэпутаты Адраджэння падтрымлівалі літоўскую незалежнасць. І ніколі не было амбіцый такога кшталту, якія заўсёды праяўляліся ў Расіі: мы забярэм Вільню.

Беларускі народ не з’яўляецца ворагам для літоўскага народу. Ворагамі з’яўляецца рэжым Лукашэнкі, але ён нелегітымны і не быў легітымным з 1996-га году. Але, напрыклад, Даля Грыбаўскайце [былая прэзідэнтка Літвы. — Еўрарадыё] добра сябе адчувала і вяла палітыку з гэтым жа рэжымам. Тое ж самае польскі ўрад яшчэ з часоў першай кадэнцыі ПіС”.  

Усаў рэзка крытыкуе літоўскі ўрад і кажа, што Літва наадварот павінна дапамагаць беларусам.

“Нічога не дадзім — ва ўсім будзем абмяжоўваць! Гэта азначае, што яны сыходзяць з таго, што беларусы — ворагі, што нават беларусы, якія знаходзяцца ў Літве, ужо з’яўляюцца патэнцыйнай небяспекай для літоўскіх нацыянальных інтарэсаў. Калі гэта было, каб беларусы выступалі ворагамі для Літвы, Украіны ці Польшчы? Заўсёды ворагам для Літвы быў рэжым Лукашэнкі, які выкарыстоўваўся Масквой. І якраз на сённяшні момант вельмі важна зрабіць усё, каб беларусы адчувалі сябе абсалютна камфортна і атрымоўвалі падтрымку ўрадаў Літвы і Польшчы. Каб маглі без візаў прыязджаць у Літву і Польшчу. Бо паспрабуй ты яшчэ атрымаць гэтую візу!”

Усаў лічыць гэта дыскрымінацыяй.

“Навошта гэта рабіць? Вось за год вайны ці ўзнікла небяспека ўнутры Літвы ці на яе межах менавіта з боку беларусаў? Не! Так, палякі групу шпіёнаў знайшлі, беларусаў. Але і ўкраінцы на карысць Расіі дзейнічаюць. Гэта непазбежна — заўсёды будуць здрайцы. Але не трэба ўвесь народ залічваць у ворагі.

Мяне гэта логіка проста здзіўляе: “Мы зараз пазачыняем ім межы, візы не будзем даваць і яны ўзбунтуюцца”. Не будуць яны бунтаваць. Наадварот будуць з вялікім непаразуменнем і крыўдай успрымаць дзеянні Літвы. Ніколі літоўскі ўрад так варожа не ставіўся да беларусаў. Гэта непрымальна!”.

Апроч спынення выдачы грамадзянства і відаў на жыхарства беларусам таксама можа быць прыпынены і прыём заявак на атрыманне віз (акрамя выпадкаў, калі хадайнічае літоўскі МЗС). Адпаведны законапраект Сейм Літвы прыняў у першым чытанні (будзе яшчэ 2-е чытанне): 113 дэпутатаў — "за", 9 — устрымаліся. Чакаецца, што новаўвядзенне пачне дзейнічаць з 15 красавіка 2023-га.

Абмежаванні збіраюцца ўвесці як адказ на агрэсію Расіі і Беларусі супраць Украіны. Іх абгрунтоўваюць інтарэсамі нацыянальнай бяспекі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі