Украіна байкатуе міністэрскае пасяджэнне АБСЕ, куды запрасілі Расію

Міністр замежных спраў Украіны Дзмітрый Кулеба не паедзе на міністэрскае пасяджэнне АБСЕ 30 лістапада і 1 снежня ў Скоп'і ў Паўночнай Македоніі. Прычынай, як піша hromadske.ua, стала запрашэнне кіраўніка расійскага МЗС Сяргея Лаўрова на гэтае пасяджэнне.

Прэс-сакратар МЗС Украіны Алег Ніколенка заявіў, што РФ паслядоўна разбурае арганізацыю бяспекі і супрацоўніцтва ў Еўропе, займаючыся шантажом і адкрытымі пагрозамі. Таксама ён нагадаў, што ў Расіі незаконна ўтрымліваюцца тры прадстаўнікі АБСЕ, якія з'яўляюцца грамадзянамі Украіны і знаходзяцца ў турмах ужо больш за 500 дзён.

З той жа прычыны ад удзелу ў пасяджэнні адмовіліся міністры замежных спраў Літвы, Латвіі і Эстоніі. На іх думку, удзел Лаўрова ў такім пасяджэнні можа легітымізаваць агрэсара як законнага ўдзельніка супольнасці свабодных нацый. "Маё бачанне: Лаўрову месца ў спецыяльным трыбунале, а не ў АБСЕ", — заявіў кіраўнік эстонскага МЗС Маргус Тсахкна.