У Запарожжы завяршылі разбор завалаў — 376-я раніца вайны
![Расійская ракета трапіла ў жылы дом у Запарожжы 2 сакавіка / @dsns_telegram](/sites/default/files/styles/gallery_main/public/2023-08/ukr_6_03.jpg.webp?itok=Shluyspp)
Расійская ракета трапіла ў жылы дом у Запарожжы 2 сакавіка / @dsns_telegram
У Запарожжы, дзе расійская ракета 2 сакавіка трапіла ў пяціпавярхоўку, завяршылі разбіраць завалы. Нагадаем, у выніку атакі тады былі разбураны 10 кватэр з пятага па першы паверхі. За час пошукава-выратавальнай аперацыі супрацоўнікі ДСНС выратавалі тут 11 чалавек, а таксама чатырох катоў і сабаку.
Прапаўшымі без вестак застаюцца пяць чалавек. Загінулі 13 чалавек, у тым ліку дзіця. Пра гэта напісаў позна ўвечары ў нядзелю сакратар Запарожскага гарсавета Анатоль Курцеў. На сёння ў горадзе абвясцілі Дзень жалобы.
![В Запорожье завершили разбор завалов — 376-е утро войны](/sites/default/files/styles/default_image_paragraph/public/paragraphs/image/photo_2023-03-05_20-59-52.jpg.webp?itok=XTPw2I3P)
Адразу некалькі надзвычайных здарэнняў у Расіі. У Белгародскай вобласці спрацавала СПА — у Новым Асколе збіта 3 ракеты, напісаў у Telegram губернатар Вячаслаў Гладкоў. Ён таксама паведаміў, што пацярпеў адзін мужчына — у яго асколачныя раненні рукі. Акрамя таго, аскепкамі пашкоджаны некалькі фасадаў і лініі электраперадачы ў некалькіх вёсках.
А ў Маскоўскай вобласці гарэў коксагазавы завод. Расійскія СМІ сцвярджаюць, што выбух адбыўся ў цэху. Пра прычыны выбуху расіяне не паведамілі. А Hromadske нагадвае, што на мінулым тыдні гарэў нафтазавод "Раснафты" ў Краснадарскім краі. Паводле некаторых звестак, на тэрыторыі нафтабазы ўзарваліся два невядомыя дроны.
Два выбухі чулі ўчора і ў акупаваным расіянамі ўкраінскім Мелітопалі. Пра гэта паведаміў гарадскі галава Мелітопаля Іван Фёдараў. Гэтыя выбухі, з ягоных слоў, "скасавалі адразу дзве вайсковыя базы акупантаў. Чакаем пацверджання ад Генштаба УСУ".
На Московському коксогазовому заводі спалахнула пожежа, площа якої становить 200 квадратних метрів pic.twitter.com/658dyLP8o5
— hromadske (@HromadskeUA) March 5, 2023
У Генштабе УСУ тым часам паведамляюць, што "украінская авіяцыя за мінулыя суткі нанесла 12 удараў па раёнах засяроджвання акупантаў, падраздзяленні ракетных войскаў і артылерыі пабілі 3 пункты кіравання, 4 раёны засяроджвання і 1 пазіцыю сродку СПА праціўніка".
Расіяне працягваюць атакаваць на Купянскім, Ліманскім, Бахмуцкім, Аўдзееўскім і Шахцёрскім кірунках. Сілы абароны Украіны адбілі тут за суткі больш за 95 расійскіх нападаў.
Працягваюцца баі ў Бахмуце. Расійская крыніца "Рыбар" піша, што расійскія сілы патроху прасоўваюцца, а УСУ, апынуўшыся пад пагрозай акружэння, "пачалі частковы вывад войскаў з цэнтральных і заходніх раёнаў" горада. Украінскія крыніцы гэта абвяргаюць. Ніякіх "тактычных зменаў" з украінскага боку не было, УСУ трымае абарону. Пра гэта заявіў у каментары CNN намеснік камандзіра батальёна "Свабода" лейтэнант Нацгвардыі Уладзімір Назаранка.
"Адводу няма. Наадварот, прыходзяць новыя рэзервы, каб трымаць абарону. Увесь раён баявых дзеянняў знаходзіцца пад хаатычным абстрэлам, але паведамленне з горадам ёсць, ёсць маршруты, якія не перакрытыя", — адзначыў лейтэнант. Траса Бахмут-Канстанцінаўка — ключавы шлях да Бахмута і выхаду з яго — застаецца пад кантролем украінскіх вайскоўцаў, падкрэсліў Назаранка. Паводле яго слоў, "праціўнік шукае слабыя месцы, боем спрабуе адцягнуць нашы сілы, адцягвае нашы рэзервы, камбінуе розныя метады і тактыкі, але яны церпяць няўдачу". Пры гэтым "сітуацыя вакол Бахмута і на яго ўскраінах вельмі падобная на пекла, як гэта адбываецца на ўсім Усходнім фронце", кажа Назаранка.
![В Запорожье завершили разбор завалов — 376-е утро войны](/sites/default/files/styles/default_image_paragraph/public/paragraphs/image/ukr_6_03_2.jpg.webp?itok=3Pf8XF74)
Прэзідэнт Уладзімір Зяленскі падчас традыцыйнага вячэрняга відэазвароту адзначыў брыгады, якія цяпер ваююць на ўсходзе Украіны — за адвагу, трываласць і нязломнасць воінаў. "Адна з самых цяжкіх бітваў. Пакутлівая і цяжкая", — сказаў ён. Зяленскі таксама анансаваў "новыя вынікі для Украіны" на гэтым тыдні, а яшчэ казаў пра падрыхтоўку да наступнага ацяпляльнага сезона. Падрыхтоўка ўжо пачалася.
"Мы прапрацоўваем усе сцэнары і зробім усё, каб падысці да наступнай зімы гатовымі да любой пагрозы", — падкрэсліў украінскі прэзідэнт.
У Еўрапейскага саюза няма падстаў думаць, што Кітай плануе перадаць Расіі ўзбраенне. Пра гэта заявіла прэзідэнт Еўрапейскай камісіі Урсула фон дэр Ляен на сумеснай прэс-канферэнцыі з канцлерам Германіі Олафам Шольцам.
"Мы не маем доказаў гэтага (планаў Пекіна даць зброю Расіі) цяпер, але павінны сачыць за гэтым штодня", — цытуе кіраўніка Еўракамісіі "Радыё Свабода".
Пра намер Кітая аказаць Расіі ваенную дапамогу пісала амерыканская прэса, у прыватнасці, The Wall Street Journal. Па дадзеных выдання, у ЗША ёсць разведданыя, якія могуць сведчыць пра тое, што Кітай абдумвае такія пастаўкі. У Пекіне на гэта адрэагавалі заўвагай, што гэта "усяго толькі здагадка". У самім Кіеве пакуль не бачаць прыкмет таго, што Кітай пагодзіцца перадаць Расіі ўзбраенне. Пра гэта на мінулым тыдні казаў кіраўнік Галоўнай управы выведкі Мінабароны Украіны Кірыл Буданаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.