У Віцебску пратэстоўцы адбівалі сваіх у сілавікоў, распачата крымінальная справа
Скрыншот з відэа з месца падзей
Шостага верасня ў Віцебску на мірнай акцыі пабіліся пратэстоўцы і міліцыя. У бойцы ўдзельнічала больш за сто чалавек.
Бойка пачалася на дарозе, дзе стаялі аўтамабілі сілавікоў, і працягнулася на полі побач:
Паводле версіі міліцыянераў, адзін з мітынгоўцаў распыліў слезацечны газ у іх бок і паспрабаваў схавацца. Але адзін з відавочцаў здарэння расказаў Еўрарадыё, што бойка пачалася, мякка кажучы, не зусім так.
— Міліцыя не змагла спыніць натоўп, які ішоў па вуліцы Праўды. Тады супрацоўнікі пад'ехалі да хваста калоны і вырвалі адтуль некалькі чалавек. Думаю, яны спрабавалі такім спосабам напалохаць людзей, — расказвае Аляксандр. — Хтосьці пабег, але шмат людзей засталося. Некалькі пратэстоўцаў пачалі падыходзіць з краю праезнай часткі, каб даведацца, каго затрымалі і чаму наогул такое здарылася, на што людзі з дубінкамі адрэагавалі негатыўна, сталі хапаць усіх запар і збіваць.
Наколькі я зразумеў, цяпер заведзена крымінальная справа за тое, што хтосьці ўдарыў міліцыянера ў вока. Таго чалавека білі дубінкай, ён проста адмахваўся рукамі, гэта быў міжвольны рух.
Пасля таго як пратэстоўцам удалося вярнуць тых, каго спрабавалі забраць міліцыянеры, хваляванні спыніліся, шэсце працягнулася. Але сілавікі не супакоіліся.
— Некалькі чалавек пабегла ў поле, за імі пабеглі сілавікі. Людзі не былі абыякавымі, і ўсе пабеглі ў той бок. Людзей, якіх білі, павалілі на зямлю, спрабавалі схапіць. Іх адбівалі ў супрацоўнікаў. Калі супрацоўнікі перасталі біць людзей і спрабаваць іх забраць, ніхто больш міліцыянераў не чапаў. Мы стаялі побач з імі, і нічога больш не адбывалася, — працягвае Аляксандр.
Пасля гэтага шэсце пад наглядам сілавікоў працягнулася па вуліцы Смаленскай, потым па Маскоўскім праспекце.
— Там вырашылі зрабіць ракіроўку, прайшліся па дварах і выйшлі на праспект Будаўнікоў. Супрацоўнікі ўвесь гэты час вялі нас, але людзі больш не баяліся і ішлі побач з тэхнікай, — дадае суразмоўнік Еўрарадыё. — Яшчэ адну спробу нешта зрабіць міліцыянеры распачалі на вуліцы Чкалава, калі мы ішлі да касцёла. Яны паспрабавалі разбіць строй. Там было вузкае месца, і яны гэтым скарысталіся. Людзі ўсталі ў счэпку, пачакалі моманту і перабеглі на другі бок дарогі.
Паводле афіцыйнай інфармацыі УУС Віцебскага аблвыканкама, 6 верасня за парушэнне заканадаўства аб масавых мерапрыемствах у Віцебску затрымана больш за 10 чалавек. Па факце гвалту ў дачыненні да супрацоўніка органаў унутраных спраў распачата крымінальная справа.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.