У Брэсце будзе чарговы масавы суд за ўдзел у пратэстах 2020-га
Брэст, 10 жніўня 2020-га / binkl.by
У Брэсце будзе чарговы масавы суд за ўдзел у пратэстах 2020-га. Па справе праходзяць восем чалавек, паведамляюць праваабаронцы.
У судзе Ленінскага раёна Брэста (суддзя — Дзмітрый Шурын) 30 ліпеня распачнецца суд адразу над 8 мясцовымі жыхарамі. Гэта — Іван Амрэйчык, Васіль Ніпарка, Аляксей Самайлюк, Анатоль Закурка, Ігар Сарокін, Сяргей Дзямідзюк, Мікіта Яхімовіч і Валянціна Жукоўская. Усіх абвінавачваюць ва ўдзеле ў паслявыбарчых акцыях пратэсту 10 жніўня 2020 года.
Жукоўскую раней асудзілі да 1,5 гады "хатняй хіміі" па "справе карагодаў". Сарокіна затрымалі на мяжы ў лютым, калі ён вяртаўся з Польшчы, дзе працаваў.
За вясну 2024-га ў Брэсце за ўдзел у пратэстах асудзілі ўжо больш за 20 чалавек.
