У сталіцы зноў высяляюць царкву "Новае жыццё"
Напярэдадні судовы выканаўца Гаспадарчага суду Мінску запатрабаваў, каб памяшканне па вуліцы Кавалёва, 72 было вызвалена на працягу тыдня.
Рашэнне прынятае судом на падставе заявы ЖРЭА Маскоўскага раёну сталіцы. Радыё Свабода нагадвае, што такога ж зместу ліст пратэстанская царква атрымала 27 лістапада 2012 году. Тады цягам васьмі дзён вернікі маліліся за вырашэнне сітуацыі і напярэдадні прызначанай даты высялення ЖРЭА адклікала свае патрабаванні. Увогуле мінскія ўлады намагаюцца выселіць царкву з 2005 года. У 2006-м вернікі нават трымалі масавы пост-галадоўку на знак пратэсту супраць дзеянняў улады. Яны прайшлі больш за 30 судовых працэсаў.
Тым часам пастар царквы "Новае жыццё" Вячаслаў Ганчарэнка знаходзіцца ў рэанімацыі. У яго, магчыма, здарыўся інсульт.
Вернікі зноў ладзяць штодзённыя малітвы. А ў бліжэйшыя выхадныя дні пройдзе свята — дзень народзінаў царквы, якой спаўняецца 21 год.
Фота — svaboda.org
