У магілёўскім ЦУМе знайшлі прадмет, падобны да выбухоўкі
З будынку ўнівермага былі эвакуяваныя ўсе наведвальнікі і абслуговы персанал.
Як паведамляе БелаПАН, падазроны прадмет у поліэтыленавым пакеце выявілі ахоўнікі гандлёвага аб'екта ў адной з ячэек камеры захоўвання.
У аховы крамы выклікалі падазрэнне паводзіны мужчыны, які зайшоў у залу з харчовымі таварамі. Наведвальнік пакінуў у ячэйцы камеры захоўвання некаторыя рэчы. Выйшаўшы з гандлёвай залы, ён забраў з ячэйкі частку рэчаў. А прадмет, падобны на бляшанку з-пад напою "Спрайт", пакруціўшы ў руках, паклаў назад у ячэйку і пакінуў яе адкрытай. Пасля гэтага грамадзянін пакінуў універмаг.
Міліцыя ачапіла будынак. Але пасля правядзення неабходных работ спецыялісты прыйшлі да высновы, што прадмет не з'яўляецца выбуховым прыстасаваннем.
Прадмет, які выклікаў падазрэнне ў аховы магілёўскага ўнівермага, апынуўся аўдыёкалонкай для МР3-плэера.
Фота — svaboda.org
