У Ляхавіцкім раёне дзеці паднялі з дна вадаёма каля ста патронаў
Частка знойдзеных патронаў / sudexpert.gov.by
Больш за 100 патронаў, прыдатных да стральбы, былі знойдзеныя на дне і беразе аднаго з вадаёмаў у Ляхавіцкім раёне. Прычым большасць з іх паспела пабываць у руках дзяцей. Хлопчыкі знайшлі гэтыя патроны, калі купаліся. Адзін з іх аднёс патроны ў школу. Гэта заўважыла маці і расказала пра знаходку сына міліцыі.
Высветлілася, што "аналагічны арсенал быў яшчэ ў некалькіх хлопцаў", гавораць у брэсцкім упраўленні Дзяржаўнага камітэта судовых экспертызаў. Пасля размовы з дзецьмі супрацоўнікі міліцыі агледзелі вадаём і прыбярэжную тэрыторыю. Сабралі там яшчэ каля 20 патронаў. Усяго на экспертызу было перададзена 105 штук. 103 з іх былі прыдатныя для стральбы з наразной агнястрэльнай зброі. Пачалася праверка.
