У Літву не пусцілі цягнік з Расіі з правакацыйнымі надпісамі
Вагон, які прыйшлося адмываць супрацоўнікам расійскай чыгункі / vsat.lrv.lt
Літоўскія пагранічнікі былі гатовы адчапіць два вагоны транзітнага цягніка Масква-Калінінград і не пусціць іх на сваю тэрыторыю з-за правакацыйных надпісаў. На адным з вагонаў яны выявілі напісаныя чорнай фарбай знак Z і ZOV. На суседнім вагоне — надпіс на кірыліцы "Вільнюс — горад Расіі".
Інцыдэнт адбыўся ў сераду на памежным пераходзе Кена. Цягнік рухаўся з Масквы ў Калінінград праз Беларусь. Персанал цягніка прымусілі выдаліць надпісы. Інакш, папярэдзілі пагранічнікі, пасажырам давядзецца перасесці ў іншыя вагоны, а распісаныя будуць адчэпленыя. На тэрыторыю Літвы іх не прапусцяць.
"Начальнік цягніка і падначаленыя пачалі сціраць анучамі і пяском забароненыя надпісы з двух вагонаў", — расказалі ў літоўскай Памежнай службе. Калі вагоны адмылі, цягнік працягнуў рух па маршруце.
