У Літве папярэджваюць пра магчымыя падпалы: узровень пагрозы высокі
![Вільня](/sites/default/files/styles/gallery_main/public/2024-05/09871ca0-7d87-11ed-a628-f15cb6709fa2.jpg.webp?itok=YTpsZJRk)
Вільня / delfi.lt
У Літве папярэджваюць пра магчымыя падпалы. Кіраўнік Нацыянальнага цэнтра кіравання крызісамі Вілмантас Віткаўскас кажа, што ўзровень пагрозы высокі. Падпальваць могуць гандлёвыя цэнтры, склады і офісы кампаній, якія аказваюць дапамогу Украіне.
"Мы заклікаем грамадства захоўваць пільнасць, — цытуе словы Віткаўскаса Delfi. — Мы кансультавалі кампаніі, прадаставілі ім рэкамендацыі, кансультавалі і ахоўныя кампаніі, якія адказваюць за бяспеку асобных аб'ектаў. Працэс не спыняецца".
Паліцыя і іншыя сілавыя структуры павысілі ўзровень пільнасці. Ахоўныя фірмы заклікалі фіксаваць усе падазроныя інцыдэнты.
Літоўскія сілавікі спасылаюцца на здарэнні ў іншых краінах, дзе былі спробы падпалаў складоў кампаній, якія дапамагаюць Украіне.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.