У Літве кажуць пра сотні прадухіленых спробаў абыходу санкцый
![У Літве кажуць пра раскрытыя спробы абысці санкцыі / Еўрарадыё](/sites/default/files/styles/main_image_watermark_/public/2023-08/bielaruskalij-0812.jpg.webp?itok=9uKwKOVu)
У Літве кажуць пра раскрытыя спробы абысці санкцыі / Еўрарадыё
У Літве прадухілілі сотні спробаў парушэння санкцый. Такія лічбы ў эфіры LRT назвала намесніца міністра камунікацый і транспарту краіны Ларэта Маскалевене.
"Падсанкцыйныя тавары не павінны перавозіцца. Іншы бок вынаходлівы і сапраўды відавочна, што не толькі з пачатку вайны, але і з пачатку прыпынення транзіту "Беларуськалію" мы назіраем самыя розныя пошукі розных спосабаў махлярства і абыходных схем — гэта праўда", — заявіла чыноўніца.
Яна паведаміла пра сотні спробаў, па выніках якіх былі пачатыя справы. Над іх раскрыццём працуюць розныя структуры Літвы.
Таксама Маскалевене пракаментавала інфармацыю аб затрыманні вагонаў з беларускімі ўгнаеннямі. Яна назвала гэта яшчэ адным выпадкам абыходу санкцыйнага рэжыму. "У выніку цягнікі былі спыненыя, інфармацыя перададзеная ў праваахоўныя органы, пракуратуру, расследуюцца відавочныя выпадкі махлярства. У СМІ трапіў толькі адзін з некалькіх соцень выпадкаў, якія былі прадухіленыя", — дадала яна.
Як паведамляла Еўрарадыё, Літоўская чыгунка затрымала 15 вагонаў з беларускімі ўгнаеннямі. Груз на суму ў 320 тысяч еўра адпраўляўся ў Дубай праз Клайпедскі порт у абыход санкцый, накладзеных на Беларусь.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.