У Літве адзначаюць "як ніколі інтэнсіўную" дзейнасць беларускага КДБ
![Вільня](/sites/default/files/styles/gallery_main/public/2023-11/lithuania_27_11.jpg.webp?itok=wHD66fca)
Вільня / pixabay.com
Беларускі КДБ актывізаваў сваю працу ў Літве, дзейнасць беларускіх спецслужбаў у краіне зрабілася як ніколі інтэнсіўнай, піша агенцтва BNS са спасылкай на кіраўніка літоўскага Дэпартамента дзяржбяспекі Дарыуса Яўнішкіса. Ён, у прыватнасці, заявіў, што ў Вільні бачаць актывізацыю дзейнасці "менавіта беларускага КДБ, якая сапраўды дасягнула гістарычных вышынь".
"Ніколі яна не была такой інтэнсіўнай", — сказаў Яўнішкіс. У Літве апошнім часам узмацнілася і расійская прапаганда. У пачатку вайны ва Украіне, калі Расія была ўпэўненая ў хуткай перамозе, яна трохі згарнула сваю працу ў Літве, "але цяпер мы адчуваем некаторую інтэнсіфікацыю", адзначыў Яўнішкіс. Ён таксама нагадаў, што апошнім часам у Літве пачасціліся ілжывыя паведамленні аб закладзенай выбухоўцы ў школах і іншых грамадскіх месцах. Гэта таксама інфармацыйныя атакі.
"Гэта інфармацыйныя аперацыі, накіраваныя на тое, каб нас заблытаць, каб мы пачалі падазраваць адно аднаго, каб мы пастаянна жылі ў гэтым пачуцці нявызначанасці, увесь час думаючы, што ўсё вельмі дрэнна. Мы гэта, без сумневу, бачым і канстатуем", — заявіў кіраўнік літоўскага Дэпартамента дзяржбяспекі.
Нагадаем, надоечы ў літоўскім Дэпартаменце міграцыі заявілі, што за апошні год 1644 беларусы былі прызнаныя пагрозай нацыянальнай бяспецы краіны. Сярод расіянаў такіх было 397 чалавек.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.