У Кітаі ў выніку снегападаў на вакзалах застаюцца дзясяткі тысяч чалавек (фота)
У Кітаі на чыгуначных вакзалах у выніку транспартнага калапсу застаюцца дзясяткі тысяч чалавек. Значныя затрымкі цягнікоў былі выкліканыя магутнымі снегападамі, якія прайшлі днямі па краіне.
На станцыі Гуанчжоў у ноч на панядзелак сабралося да 100 тысяч чалавек, паведаміла мясцовая паліцыя. Цяпер там працягваюць заставацца каля 50 тысяч чалавек, якія спрабуюць з’ехаць цягніком.
У паліцыі паведамілі, што для аховы правапарадку задзейнічаны 5200 чалавек.
Адзначаецца, што такая сітуацыя адбылася напярэдадні кітайскага новага году, калі сотні тысяч чалавек едуць з вялікіх гарадоў дадому, каб адсвяткаваць гэты дзень з сям’ёй.
Перамяшчэнне кітайцаў напярэдадні новага году называюць самай масавай унутранай міграцыяй ў свеце. Яна будзе доўжыцца больш за месяц і скончыцца толькі напачатку сакавіка.
Па некаторых звестках квіткі на міжгародні траспарт у гэты перыяд былі раскупленыя яшчэ месяц таму.