У Храме Труны Гасподняй у Іерусаліме сыйшоў прасвядны агонь
![Прасвядны агонь](/sites/default/files/styles/gallery_main/public/2024-05/screenshot_2024-05-04_150110.png.webp?itok=xVaMSDL7)
Прасвядны агонь / Скрыншот з відэа РИА Новости
У Храме Труны Гасподняй у Іерусаліме сыйшоў прасвядны агонь. Падзея, як звычайна, выклікала шалёны ажыятаж у праваслаўных хрысціянаў, якія гэтымі днямі святкуюць Вялікдзень.
Тым часам журналіст з Грэцыі даказаў, што цуд Сашэсця прасвяднага агню — зусім не цуд. А потым выйграў суд пра паклёп і разгалошванне персанальных даных супраць праваслаўных іерархаў.
Дзімітрыс Алікакас пад выглядам грэцкага паломніка прыехаў у Іерусалім і пагаварыў з супрацоўнікамі тамтэйшага патрыярхата. Адзін з іх (прычым не хто-небудзь, а арцыбіскуп Ісідар) прызнаўся, што ўласнаруч запальваў лампаду на Труне Гасподняй звычайнай запальнічкай. Не адзін і не два разы. "Вось гэтымі самымі рукамі".
29 сакавіка ў Афінах скончыўся апошні суд на гэтую тэму. "Гэты юрыдычны вынік азначае сабой трыумф журналісцкага расследавання і рашучае абвяржэнне хлусні даўжынёй у шмат стагоддзяў", — радуецца Алікакас.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.