У Брэсце пракуратура вынесла папярэджанне грамадскаму актывісту

Грамадскага актывіста Аляксандра Храпко папярэдзілі аб недапушчальнасці дзейнасці ад імя незарэгістраванай арганізацыі. Пасля наведвання 13 лістапада пракуратуры Брэсцкай вобласці, малады чалавек паведаміў Еўрарадыё, што атрымаў папярэджанне за дзейнасць у шэрагах незарэгістраванай партыі БХД.

Сябрам аргкамітэта "Беларускай хрысціянскай дэмакратыі" праваахоўнікі яго прызналі паводле некалькіх публікацый, размешчаных на сайце арганізацыі. Аляксандр Храпко з такім рашэннем не згодны, бо ў артыкулах, дзе фігуравала яго імя і прозвішча, размова ішла пра кампанію "Народны кантроль".

Храпко: "Кампанія "Народны кантроль" не мае непасрэднага дачынення да партыі, але яны неяк змаглі гэта звязаць. "Народны кантроль" — гэта кампанія, дзе праводзіўся збор подпісаў. Гэта — народная ініцыятыва, што не забаронена заканадаўствам".

Папярэджанне малады чалавек лічыць незаконным і збіраецца яго абскардзіць.

Фота — Fotolia