У беларускіх аптэках знік прэпарат ад дэпрэсіі. Гэта праблема?

20/11/2023 - 15:16

Большасць лекаў купіць можна / Unsplash

Мінчукі паведамляюць, што замест украінскіх лекаў ад дэпрэсіі цяпер адносна свабодна можна купіць расійскія і індыйскія аналагі. Еўрарадыё высветліла, ці ёсць праблема ў знікненні "Флуксену" і што наогул адбываецца на рынку лекаў ад дэпрэсіі, якія прадаюцца ў Беларусі.

Беларускі псіхіятр Павел Перапёлкін кажа, што "Флуксен" — гэта флуаксетын, адзін з самых ранніх антыдэпрэсантаў. Пэўны час гэты прэпарат быў надзвычай папулярны ў свеце (быў больш вядомы пад назвай "Празак"), а цяпер паступова выцясняецца навейшымі прэпаратамі.

— Паводле звестак сайта tabletka.by, у продажы ёсць узоры расійскай і індыйскай вытворчасці. Альтэрнатыва ёсць. Цяперашнюю сітуацыю я б дакладна не назваў крытычнай, у тым ліку таму што прэпарат не самы новы і не самы папулярны, — запэўнівае псіхіятр.

“Беларускія і расійскія прэпараты — гэта латарэя”

У цэлым жа, паводле яго слоў, пераважная большасць лекаў, неабходных падчас лячэння афектыўных расстройстваў, у продажы ёсць. Прынамсі, найбольш папулярныя. Гэта датычыць антыдэпрэсантаў, а таксама нарматымікаў і нейралептыкаў, якія выкарыстоўваюцца пры дэпрэсіўных разладах. Аднак па некаторых прэпаратах выбар усё ж абмежаваны. Многія прадстаўленыя адным або, максімум, двума вытворцамі, часцяком — беларускімі і расійскімі.

Цяпер у продажы з выключна беларускіх або расійскіх лекаў у продажы прысутнічаюць толькі амітрыптылін, аланзапін і літыю карбанат. У астатніх выпадках хоць адна альтэрнатыва, але ёсць. Таму доктар і тлумачыць, што на гэты момант істотнай праблемы няма.

— У прыватных выпадках, вядома, гэта можа стаць істотнай цяжкасцю. Але калі тэндэнцыя працягнецца, то яна, безумоўна, стане сістэмнай, — падкрэслівае Павел.

Прычын знікнення лекаў можа быць шмат

Лекі ад дэпрэсіўных разладаў — не першыя, з магчымым недахопам якіх сутыкаліся беларусы. У свой час з продажу знікалі таблеткі, якія выпісваюць пры раку, ад ціску і некаторыя іншыя. Павел Перапёлкін лічыць , што гэта можа быць звязана са зніжэннем зацікаўленасці ў беларускім рынку праз ускладненне лагістычных паставак.

— Таксама прычыну варта пашукаць і ў выніку змяншэння попыту ў сувязі са зніжэннем плацежаздольнасці насельніцтва. Магчыма, прычына ў зніжэнні цікавасці што да закупкі імпартных лекаў дзеля інтарэсаў беларускіх вытворцаў, — кажа псіхіятр.

Паводле яго слоў, наяўнасць і даступнасць поўнага спектру ўсіх лекаў вельмі важныя. Інакш людзі, якія пакутуюць на афектыўныя і любыя іншыя разлады, застануцца без дапамогі.

Цэны могуць быць завышаныя

Што да цэн, то розніца вар'юецца ад прэпарату да прэпарату і ў большасці выпадкаў неістотная, аднак бываюць і выключэнні з правілаў.

— Напрыклад, беларускі эсцыталапрам каштуе ў раёне 25-34 рублёў, славенскі — ад 20 з той самай верхняй мяжой, дацкі ж — ад 62 да 94 рублёў. А вось беларускі і польскі ламатрыджын адрозніваюцца амаль у 10 разоў, і іншых аналагаў амаль няма: 30 таблетак па 50 мг беларускага каштуюць у сярэднім каля 5-6 рублёў, а польскага — ад 54 да 75 рублёў.

У параўнанні з цэнамі некаторых аналагічных лекаў за мяжой Павел расказвае, што цэны ў Беларусі могуць быць завышаныя. Так, у Грузіі, 100 мг "Ламікталу" па 30 таблетак у пераліку каштуюць прыкладна 30 рублёў. У Беларусі — ад 85 да 140 рублёў. Дацкі "Цыпралекс" у Беларусі каштуе 62-94 рублі, у Грузіі — каля 30 рублёў у пераліку.