У Беларусі пастаўлены чарговы антырэкорд нараджальнасці
Дзіця, ілюстрацыйнае фота / Unsplash
У Беларусі ў 2023 годзе нарадзілася рэкордна нізкая колькасць дзяцей, паведамляе Міністэрства юстыцыі. Мінюст даў справаздачу, што летась у краіне зарэгістравалі больш за 65 тысяч актаў пра нараджэнне. Гэта катастрафічна мала, адзначае выданне. Гэта самы нізкі паказчык за ўвесь час, што вядуцца падлікі.
Для параўнання, у 1953 годзе ў Беларусі нарадзілася амаль у тры разы больш дзяцей — 176 200. Потым гэтая колькасць то зніжалася, то павялічвалася (у 1973-м — 144 729 дзяцей, у 1983-м — 173 510). Сур'ёзны правал здарыўся ў пачатку нулявых. У 2003-м нарадзілася крыху больш за 88 тысяч дзяцей, але потым зноў пачаўся ўздым нараджальнасці. У 2013-м гэты паказчык склаў ужо больш за 117 тысяч.
У 2019-м — да COVID, пратэстаў, рэпрэсій і масавага выезду беларусаў за мяжу — у краіне нарадзілася 87 602 дзіцяці.
Да гістарычнага мінімуму апусціўся летась і каэфіцыент нараджальнасці (адносіны колькасці народжаных да агульнай сумы насельніцтва). Ён склаў 7,08. Гэта менш, чым у часы Другой сусветнай вайны. У 2013 годзе, для параўнання, гэты паказчык складаў 12,46, у 2019-м — 9,3.
