У Аўстрыі абвяргаюць інфармацыю, што пагадзіліся плаціць за газ рублямі
Карл Нехамер / AFP
Вена будзе плаціць за расійскі газ у еўра, заявіў канцлер Аўстрыі Карл Нехамер.
"Аўстрыя прытрымліваецца еўрапейскага пункту гледжання і падтрымлівае сумесна прынятыя санкцыі ЕС", — напісаў ён у Twitter.
Такім чынам, відавочна, ён адрэагаваў на паведамленні пра гатоўнасць Аўстрыі перайсці ў разліках за расійскі газ на рублі. Раней такое рашэнне прынялі Сербія і Венгрыя. Ён назваў гэтыя сцвярджэнні адносна Аўстрыі "фэйкавымі навінамі расійскай прапаганды".
Bevor hier Fake News der russischen Propaganda weiter verbreitet werden. Die OMV bezahlt Gaslieferungen aus Russland selbstverständlich weiterhin in Euro. Österreich hält sich auf Punkt und Beistrich an die gemeinsam beschlossenen EU-Sanktionen.
— Karl Nehammer (@karlnehammer) April 27, 2022
Расія пачала патрабаваць ад еўрапейскіх партнёраў разлічвацца за газ у рублях у канцы сакавіка. Такім чынам у Маскве адрэагавалі на еўрапейскія санкцыі супраць Расіі праз яе агрэсію ва Украіне. У ЕС тады заявілі, што не будуць плаціць за расійскі газ у рублях. "Газпрам" ужо спыніў пастаўкі газу ў Польшчу і Балгарыю праз адмову плаціць у рублях. Кіраўнік Еўракамісіі Урсула фон дэр Ляен назвала гэтую пастанову "чарговай спробай Расіі выкарыстоўваць газ у якасці інструмента шантажу". Яна лічыць такую палітыку неапраўданай і непрымальнай.
