У Афганістане жанчынам забаранілі спяваць і гаварыць на публіцы
![Афганскія жанчыны](/sites/default/files/styles/gallery_main/public/2024-08/snimok_ekrana_2024-08-24_v_17.17.22.png.webp?itok=8-CGuvo8)
Афганскія жанчыны / Reuters
У Афганістане ўводзяцца больш жорсткія правілы паводзін на публіцы для жанчын. Гэта вынікае з першага афіцыйнага дакумента, які рэгулюе грамадскае жыццё. Пра яго піша CNN.
Законы датычацца такіх аспектаў паўсядзённага жыцця, як грамадскі транспарт, музыка, святы. Асобны артыкул – 13-ты – прысвечаны жанчынам. Напрыклад, там гаворыцца, што жаночы голас лічыцца інтымным, і таму ім нельга спяваць, дэкламаваць або чытаць услых на публіцы.
Таксама закон рэгулюе тое, якое адзенне абавязаны насіць жыхаркі Афганістана. Яно не можа быць тонкім, кароткім або аблягаць цела.
– Мы запэўніваем вас, што гэты ісламскі закон будзе аказваць вялікую дапамогу ў прасоўванні цноты і выкараненні распусты, – сказаў прэс-сакратар Міністэрства па прадухіленні распусты і заахвочванні дабрадзейнасці.
Усяго ў дакуменце 35 артыкулаў. Яны закранаюць розныя сферы жыцця афганцаў. Напрыклад, забараняюць публікацыю малюнкаў жывых істот, прайграванне музыкі, перавозку адзінокіх жанчын-падарожніц, зносіны мужчын і жанчын, якія не з'яўляюцца сваякамі. А яшчэ адзін артыкул абавязвае пасажыраў і вадзіцеляў здзяйсняць малітвы ў пэўны час.
За парушэнне гэтых правілаў праваахоўнікі могуць выносіць папярэджванні або арыштоўваць парушальнікаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.