Сяргей Румас заяўляе, што не будзе займацца палітыкай

19/02/2021 - 12:36

Сяргей Румас не плануе займацца палітыкай, а хоча працаваць у звыклым для сябе фінансавым асяроддзі. Пра гэта экс-прэм'ер заявіў у каментары парталу TUT.by.

На пачатку лютага былі затрыманыя саўладальнік Тураўскага малочнага камбіната Ігар Чарняўскі і шэраг дзеючых і былых супрацоўнікаў банкаў. У СМІ з'явіліся здагадкі, быццам гэтыя затрыманні звязаныя з атакай на былога прэм'ер-міністра Сяргея Румаса — ён не толькі працаваў з усімі затрыманымі, але і падтрымліваў добрыя адносіны.

Сам экс-прэм'ер знаходзіцца за мяжой.

"У цяперашні момант я кантактую па працы з некалькімі фінансавымі інстытутамі і фондамі, усе з якіх, так атрымалася, знаходзяцца за мяжой. Як вы разумееце, у сувязі з эпідэміялагічным становішчам любыя перамяшчэнні зараз моцна ўскладненыя. Нейкі час таму знаходзіўся ў Казахстане, цяпер пакуль у Лондане", — паведаміў экс-кіраўнік урада.

Па словах Румаса, праекты, з якімі ён звязаны, могуць прыйсці ў Беларусь, але іх стрымліваюць "негатыўныя інвестыцыйныя настроі". Таму ён вядзе перамовы і плануе пакуль што заставацца за мяжой.

Ён запэўнівае, што палітычнай дзейнасцю займацца не плануе. "Праекты фінансава-інвестыцыйныя, і ўдзел у любым з іх не прадугледжвае палітычнай актыўнасці, гэта агаворваецца практычна адразу. Калі б у мяне былі такія планы, то за мінулы пасля сыходу ў адстаўку час яны б ужо неяк рэалізаваліся. Цяпер я б хацеў вярнуцца ў больш звыклае для сябе фінансавае асяроддзе", — тумачыць экс-прэм'ер.

Пра затрыманні ў Беларусі ён ведае. Па словах Румаса, прэтэнзіі датычаць 2011-2012 гадоў, калі Белаграпрамбанк даваў ільготнае фінансаванне па праграме Прыпяцкага Палесся сваім даччыным прадпрыемствам "Тураўшчына" і Тураўскі малочны камбінат. Румас распрацоўваў праграму, калі кіраваў Беаграпрамбанкам, а потым курыраваў яе як віцэ-прэм'ер. Праграму ён лічыць паспяховай, бо дзякуючы ёй не толькі Тураў, але і ўвесь Жыткавіцкі раён выйшаў з адсталых у лідары.

А вось наконт прэтэнзіяў ад правяраючых Румас не ведае. "Камітэт дзяржкантролю штогод, пачынаючы з 2011 года, дакладваў кіраўніку дзяржавы, што фінансаванне праграмы ажыццяўляецца правільна. Паколькі, згодна з дакументам, менавіта на яго быў ускладзены кантроль за мэтавым выкарыстаннем крэдытных рэсурсаў", — падкрэслівае экс-прэм'ер. Ён спадзяецца, што бліжэйшым часам усе пытанні будуць знятыя.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.