Святара і палітвязня Уладзіслава Багамольнікава арыштавалі сёмы раз запар

Святара Уладзіслава Багамольнікава арыштавалі сёмы раз запар. Гэтым разам суд Ленінскага раёна Мінска прызначыў яму 13 сутак адміністрацыйнага арышту. Агулам за кратамі Багамольнікава будуць утрымліваць 101 дзень, піша @viasna96.

Уладзіслаў Багамольнікаў — клірык Мінскай епархіі Беларускай Праваслаўнай Царквы, выкладчык Мінскай духоўнай акадэміі. Ён абвяшчаў галадоўку ў падтрымку палітвязня Ігара Лосіка, служыў паніхіду па забітым сілавікамі пратэстоўцу Раману Бандарэнку.

Супрацоўнікі ГУБАЗіК выламалі дзверы ў кватэру святара і затрымалі яго 31 жніўня, адправілі на Акрэсціна. Спачатку былі 14 сутак адміністрацыйнага арышту. Пасля неаднаразова дадаваліся новыя суткі.

Праваабаронцы пішуць, што Багамольнікава бесперапынна ўтрымліваюць у нечалавечых умовах. Навуковец Сяргей Гаранін, які таксама быў на Акрэсціна, паведаміў, што святар некаторы час трымаў галадоўку, а стан здароўя яго пагоршыўся. Гаранін лічыць, што яго там забіваюць.

Група "Хрысціянская візія" прыняла заяву ў справе пераследу святара: "Мы выказваем захапленне хрысціянскай мужнасцю святара Уладзіслава Багамольнікава, які ў самых складаных умовах захоўвае прысутнасць духу, па-хрысціянску падтрымлівае блізкіх і не ідзе на несумяшчальныя з яго перакананнямі кампрамісы".

Праваабаронцы прызналі Багамольнікава палітвязнем.