Суд над Юрыем Чыжом зрабілі закрытым
Юрый Чыж / Onliner.by
Суд над бізнесоўцам Юрыем Чыжом зрабілі закрытым, піша "Народная Воля". Пра гэта папрасіў пракурор, спаслаўшыся на тое, што ў матэрыялах справы ёсць інфармацыя для службовага карыстання, якую нельга абнародаваць.
Суддзя Валерый Есьман пагадзіўся з прапановай.
Паведамляецца, што сам бізнесовец знаходзіцца пад падпіскай аб нявыездзе. Паводле некаторых інкрымінаваных яму артыкулаў Чыж атрымаў памілаванне.
Засталося не да канца зразумелым, якія артыкулы засталіся ў абвінавачанні Чыжу, а якія адтуль прыбралі.
Раней паведамлялася, што яго вінавацяць у злоўжыванні ўладай або службовымі паўнамоцтвамі, ухіленні ад выплаты падаткаў, адмыванні грошай і махлярстве.
Затрымалі Чыжа ў сакавіку 2021-га, калі ён вярнуўся з Расіі. Тады ж разам з ім былі затрыманыя кіраўнікі некалькі кампаній, якія засталіся пасля разгрому яго бізнес-імперыі. У ліпені 2021-га кампанію "Трайпл" прызналі банкрутам. На пачатку восені 2022-га былы "кашалёк" Аляксандра Лукашэнкі выйшаў з-за кратаў.
