Стывен Сігал зноў прыедзе ў Мінск у лістападзе

Знакаміты амерыканскі акцёр Стывен Сігал зноў прыедзе ў Мінск у пачатку лістапада 2016 года. У Dana Holdings кажуць, што ён будзе іх госцем. Як вядома, акцёр збіраецца купіць паверх у доме шматфункцыянальнага комплексу "Маяк Мінска", які будуе міжнародная група кампаній. Больш таго, БЕЛТА, са слоў Сігала, паведамляе, што знаёмыя і сябры акцёра разглядаюць варыянты шматмільярдных інвестыцый у падобныя праекты ў Беларусі. Сам ён гатовы ўкласці некалькі мільёнаў долараў у будаўніцтва "Маяка Мінска".

БелаПАН спрабаваў атрымаць каментар у Dana Holdings, але толькі даведаўся пра час, калі Стывен Сігал зноў наведае Беларусь. Дарэчы, група кампаній падкантрольная сербскім бізнесменам, братам Багалюбу і Драгаміру Карычам, якія асабіста знаёмыя з Аляксандрам Лукашэнкам. У Беларусі Dana Holdings працуе больш за восем гадоў. Самыя буйныя праекты — шматфункцыянальныя комплексы "Маяк Мінска", "Мінск-Мір", жылыя комплексы "Вівальдзі", "Чайкоўскі" і "Рахманінаў".

Як паведамляла Еўрарадыё, падчас наведвання нашай краіны Стывен Сігал быў госцем Аляксандра Лукашэнкі, які частаваў яго морквай, якую асабіста пачысціў.