Стваральнікі аўдыёфармату mp3 паведамілі пра яго “смерць”
Стваральнікі аўдыёфармату mp3 паведамілі пра яго “смерць”. На працягу апошніх дваццаці гадоў пашырэнне з’яўлялася стандартам для лічбавых музычных прыладаў. І вось нямецкі інстытут інтэгральных схемаў таварыства Фраўнгофера паведаміў, што ў красавіку 2017-га скончыліся апошнія патэнты на фармат і былі спынены зборы ліцэнзійных адлічэнняў з вытворцаў праграмнага забеспячэння. “Мы ўдзячныя ўсім за гіганцкую падтрымку, якая дапамагла зрабіць фармат mp3 галоўным аўдыёфарматам у свеце за апошнія 20 гадоў”, — цытуе паведамленне “Бі-Бі-Сі”.
Адзначаецца, што адной з прычын адмовы ад згаданага аўдыёфармату стала з’яўленне новых фарматаў. Большасць тэлеканалаў і радыёстанцый ужо перайшлі на сучасныя ISO-MPEG кадэкі, якія забяспечваюць больш высокую якасць гуку. У інстытуце інтэгральных схемаў таварыства Фраўнгофера перакананыя, што менавіта за гэтымі аўдыёфарматамі будучыня. Што да аўдыёзапісаў mp3, то іх па-ранейшаму можна будзе прайграваць на прыладах, якія іх падтрымліваюць.
