Спектакль пра Гары Потэра пабіў рэкорд па колькасці прэмій Аліўе

Спектакль “Гары Потэр і праклятае дзіця” атрымаў рэкордную колькасць узнагарод на цырымоніі ўручэння брытанскай тэатральнай прэміі імя Лоўрэнса Аліўе, інфармуе “Бі-Бі-Сі”. Пастаноўка была прадстаўлена ў 11 намінацыях і атрымала дзевяць узнагарод. Гэта рэкорд у гісторыі прэміі.

Спектакль выйграў у намінацыях “Найлепшая п'еса”, “Найлепшы рэжысёр” (Джон Ціфані), “Найлепшы акцёр” (Джэймі Паркер за ролю Гары Потэра), “Найлепшая актрыса другога плана” (Нома Думезвені за ролю Герміёны Грэйнджэр), “Найлепшы акцёр другога плана” (Энтані Бойл за ролю Скорпіуса Малфоя). Тэатральнай пастаноўцы таксама дасталіся прызы за найлепшую сцэнаграфію, гук, святло і касцюмы.

Папярэдні рэкорд належыць п'есе “Загадкавае начное забойства сабакі”, якая ў 2013 годзе атрымала сем узнагарод прэміі Аліўе, у тым ліку і прыз за найлепшы спектакль.