СМІ: еўраперавозчыкам дазволяць заязджаць у Беларусь толькі на 50 км
Расія і Беларусь "сіметрычна" адказалі на санкцыі ў сферы лагістыкі. Па звестках польскага профільнага выдання logistyka.rp.pl, еўрапейскім перавозчыкам будзе забаронена ўязджаць у Беларусь далей, чым на 50 км.
Мяркуецца, што еўрапейцы будуць пакідаць тавары ў лагістычных цэнтрах, а далей іх будуць везці беларускія і расійскія кампаніі. Пазней гэтая інфармацыя была пацверджаная афіцыйна.
Раней ЕС у рамках пятага пакета санкцый забараніў беларускім і расійскім кампаніям перавозку грузаў па тэрыторыі Еўрасаюза. Да 16 красавіка ўсе беларускія і расійскія фуры мусяць пакінуць тэрыторыю ЕС.
Пад забарону трапілі толькі кампаніі, зарэгістраваныя ў Беларусі і Расіі. Перавозчыкі, зарэгістраваныя ў іншых краінах, па-ранейшаму змогуць працаваць. Таксама забарона не датычыць фур з лекамі, гуманітарнай дапамогай і некаторымі іншымі катэгорыямі тавараў.
