Следчыя выставілі абвінавачванне Андрэю Бяляўскаму, які захоўваў патрон

Следчыя выставілі абвінавачванне Андрэю Бяляўскаму, які захоўваў патрон

Андрэю Бяляўскаму, на якога пачалі крымінальную справу за захоўванне патрона, выставілі афіцыйнае абвінавачанне. Яго вінавацяць па частцы 2 артыкула 295 Крымінальнага кодэксу (Незаконныя выраб, набыццё, перадача ў валоданне, збыт, захоўванне, перавозка, перасылка або нашэнне агнястрэльнай зброі, боепрыпасаў, выбуховых рэчываў і г.д.). Пра гэта піша праваабарончы сайт "Вясна" са спасылкай на самога Бяляўскага пасля допыту ў Следчым камітэце.

Максімальнае пакаранне, якое пагражае па гэтым артыкуле, — да сямі гадоў пазбаўлення волі з канфіскацыяй маёмасці або без канфіскацыі.

Як паведамлялася раней, Андрэй Бяляўскі — былы фігурант "справы Белага легіёна", якую Следчы камітэт нядаўна закрыў за нязначнасць парушэння. Падчас ператрусу ў яго знайшлі адзіны патрон, які доўгі час захоўваўся ў шафе ў якасці сувеніра. 

Сам Бяляўскі падчас допыту перадаў следчаму хадайніцтва пра спыненне крымінальнага пераследу. Ён папрасіў прызнаць, што яго ўчынак не ўяўляе грамадскай небяспекі і з'яўляецца юрыдычна нязначным. 

Праваабаронца Валянцін Стэфановіч звяртае ўвагу на тое, што патрон быў знойдзены ў рамках "справы Белага легіёна", а дзеянні абвінавачаных па гэтай справе былі прызнаныя юрыдычна нязначнымі. Таму лагічным, на яго думку, было б спыніць і следства супраць Бяляўскага. 

Апошнія навіны

Галоўнае

Выбар рэдакцыі