Шумчанка: Некалькі валютных курсаў не ўратуюць малы бізнэс

Па словах старшыні грамадскага аб’яднання “Перспектыва” Анатоля Шумчанкі, набываць валюту на біржы будуць мець права толькі юрыдычныя асобы.

Прадпрымальнікі ж — асобы фізічныя, набываць валюту яны могуць толькі ў абменніках. А іх “легалізацыя” не закранае: курс у пунктах абмену валют захаваецца ў раёне 3100 рублёў за долар — акурат такі, па якім сёння здаваць амерыканскія грошы ніхто не хоча.

Анатоль Шумчанка: “Я прагназую, што праблемы з валютай не вырашацца ў бліжэйшы месяц, як мінімум. І прадпрымальнікам будзе вельмі цяжка. Бо ім давядзецца недзе адшукваць валюту. І я не выключаю стварэння нейкага “ценявога” рынку валютнага ў бліжэйшы час. Хто ў яго будзе ўцягнуты? Найперш, суб’екты гаспадарання. Прычым вельмі рознага ўзроўню”.

І нават чаканы расійскі крэдыт памерам у 3 мільярды долараў, лічыць Шумчанка, не ўратуе сітуацыю. Найперш з-за таго, што, паводле афіцыйных звестак, “вырашаць пытанні з ім” будуць цягам месяца. Да таго ж, кажа, яго наўрад ці дадуць цалкам — могуць выдаваць траншамі.

Наконт магчымай дэвальвацыі Шумчанка сцвярджае, што de facto яна ўжо адбылася! Кошты на прадукты харчавання ды іншыя тавары выраслі: гандляры курс ужо “пералічылі”. Згодна са словамі эксперта, улады зараз могуць правесці “вымушаную” дэвальвацыю, абвінаваціўшы ў яе правядзенні прадпрымальнікаў.

Анатоль Шумчанка: “Я не выключаю такога варыянту падзей, калі ўсё будзе абстаўлена такім чынам, што будзе ўсё звалена на прадпрымальнікаў — дробных, сярэдніх, буйных. Маўляў: “Паглядзіце, мы курс трымалі, а яны дэвальвацыю зрабілі, яны ўсё пералічылі, гэта яны ўсё абвалілі!”. Але ўсе цэннікі на харчаванне ды іншыя тавары пералічваюцца ў гіпермаркетах і крамах. А менавіта прадпрымальнікі не “лупяць” такіх цэн. Яны пераліваюць на 3300, максімум — па 3500”.

І працуюць, кажа, у большасці сабе ў страту. У той час, калі тыя ж гіпермаркеты робяць пералік па 3700 і вышэй. А менавіта яны, кажа Шумчанка, вельмі цесна звязаныя з дзяржавай.