Штэфан Фюле: Па шэрагу параметраў гэтыя выбары не лепшыя за мінулыя

Па словах Еўракамісара па пытаннях пашырэння ЕС і палітыкі добрасуседства Штэфана Фюле, які сёння наведвае Мінск, Еўрасаюз хоча бачыць ясны прагрэс у дэмакратычных стандартах на гэтых выбарах. Тады ЕС зможа абнавіць і паглыбіць адносіны з Беларуссю. Пра гэта ён будзе размаўляць з міністрам замежных спраў Беларусі Сяргеем Мартынавым.

Штэфан Фюле: "Падчас маёй папярэдняй сустрэчай з Сяргеем Мартынавым і Аляксандрам Лукашэнкам [8-9 ліпеня 2010 года – заўвага Еўрарадыё] я адзначыў, у якіх дакладна шасці сферах ЕС хоча бачыць прагрэс: рэгістрацыя кандыдатаў, склад выбарчых камісій, праблема датэрміновага галасавання, працэс падліку галасоў, доступ да СМІ, свабода сходаў".

Па яго словах, прагрэсу па шэрагу з іх няма. Так, калі рэгістрацыя кандыдатаў праходзіць нармальна, то паляпшэнняў адносна складу выбарчых камісій не назіраецца – менш за 1% прадстаўнікоў апазіцыі не адпавядае чаканням ЕС, адзначыў еўракамісар. Па яго словах, доступ да СМІ – складанае пытанне для краіны з дзяржаўнай манаполіі медыяў. Да таго ж, адкрытым застаецца пытанне з датэрміновым галасаваннем.

Штэфан Фюле паведаміў, што ў мінулую пятніцу Еўракамісія адкрыла перамоўны мандат на аблягчэнне візавага рэжыму і дамовы аб рэадмісіі. Нагадаем, аб гэтым Еўракамісію заклікалі замежныя міністры краін ЕС у сваім рашэнні па Беларусі 25 кастрычніка. Цяпер гэтыя дзве тэмы абмяркуюць працоўныя групы краін Еўрасаюза, а таксама Еўрапарламент.

Па Сумесным прамежкавым плане абмеркаванне ўжо ідзе: "СПП зможа замяніць адсутнасць прававога дагавора паміж ЕС і Беларуссю. Гэта план крытычнага набліжэння з Беларуссю, як правесці рэформы і працэс мадэрнізацыі, як развівацца ва ўсіх сферах. Уключна з такой чуллівай для ўладаў і важнай для нас, як правы чалавека і дэмакратыя".

Па словах еўракамісара, галоўная мэта яго візіту – выказаць падтрымку беларускаму народу напярэдадні важнай падзеі ў палітычным жыцці краіны, прэзідэнцкіх выбараў. Ён ужо сустрэўся з прадстаўнікамі грамадзянскай супольнасці і абмеркаваў выбарчую кампанію ды другі Форум грамадзянскай супольнасці, які пройдзе 18-19 лістапада ў Берліне.

Штэфан Фюле: "Мы лічым, што моцная развітая грамадзянская супольнасць – найлепшая пляцоўка дэмакратыі. Я выражаю гатоўнасць Еўрасаюза разгледзець варыянты большай падтрымкі грамадзянскай супольнасці Беларусі цяпер і ў будучыні".

Еўракамісар Штэфан Фюле наведвае Беларусь з прадстаўнічай дэлегацыяй. У яе складзе – старшыня прадстаўніцтва Еўрасаюза ва Украіне і Беларусі Жазэ Мануэль Пінту Тэйшейра (José Manuel Pinto Teixeira), старшыня Прадстаўніцтва ЕС у Беларусі Жан-Эрык Хольцапфель (Jean-Eric Holzapfel), старшыня Аддзела па Ўкраіне, Беларусі, Малдове і Паўднёвым Каўказе Дырэктарата Еўракамісіі па замежных адносінах Джон К'яер (John Kjaer).

Глядзі таксама:

Еўракамісія прапануе Беларусі зрабіць эканоміку больш моцнай