Серыйнага гвалтаўніка з Расіі асудзілі ў Беларусі на 18 гадоў зняволення
![Серыйнага гвалтаўніка з Расіі асудзілі ў Беларусі на 18 гадоў зняволення](/sites/default/files/styles/gallery_main/public/2023-08/000020_465560.jpg.webp?itok=nwN3fGoR)
Серыйнага гвалтаўніка з Расіі асудзілі ў Беларусі на 18 гадоў зняволення. Такое рашэнне вынес Брэсцкі абласны суд. Пакаранне 45-гадовы жыхар Санкт-Пецярбурга будзе адбываць у папраўчай калоніі ва ўмовах узмоцненага рэжыму. Яго прызналі вінаватым у "згвалтаванні, гвалтоўных дзеяннях сэксуальнага характару, у тым ліку здзейсненых паўторна", інфармуе БЕЛТА.
На працягу 20 гадоў (у 1994-2014 гадах) мужчына прыязджаў у Беларусь да сваякоў, нападаў на жанчын, гвалтаваў і рабаваў іх. Пацярпелымі па справе прызналі 35 чалавек, аднак асуджаны расіянін быў толькі за здзяйсненне злачынства ў адносінах адной жанчыны. Па шэрагу артыкулаў Крымінальнага кодэксу яго вызвалілі ад адказнасці ў сувязі з заканчэннем тэрміну даўнасці, паколькі яны былі здзейснены больш за 10 гадоў таму. Аднак пацярпелыя ў далейшым маюць магчымасць зноў звяртацца ў суд для спагнання матэрыяльнай кампенсацыі за нанесеныя маральныя і маёмасныя страты.
Расіяніна затрымалі ў лістападзе 2015 года. Справу расследавала галоўнае следчае ўпраўленне Следчага камітэта Беларусі, яе разглядалі на закрытым судовым пасяджэнні.