Самалёты з палякамі вярнуліся ў Варшаву

Нагадаем, 9-10 кастрычніка сем’і ахвяр катастрофы ляталі ў Смаленск, каб ушанаваць сваіх загінулых. Потым яны вылецелі дамоў на двух самалётах: Boeing 737-400 і Embraer. У “боінга” сапсаваўся элемент рухавіка і каля 70 чалавек разам з жонкай польскага прэзідэнта засталіся ў Віцебску, дзе беларусы ў аэрапорце падалі ім вячэру.

11 кастрычніка раніцай у Віцебск па іх прыбылі два “эмбраэры”, і пасля 12-гадзіннай затрымкі палякі выправіліся дадому. Разам з усімі з Віцебска вылецела першая ледзі Польшчы Анна Камароўска.

Раман Вількашэўскі, прэс-сакратар офіса прэзідэнта Польшчы, сказаў перад адлётам з Віцебска, што ў Беларусі да іх ставіліся вельмі добра:

Раман Вількашэўскі: - Ад учорашніх падзеяў самыя яркія ўражанні - гэта ад дапамогі з боку беларусаў. Адзіны ўчорашні клопат - вельмі моцная стома, мы былі 24 гадзіны на нагах, але хутка нас рассялілі ў гатэль і таму мы вельмі задаволеныя арганізацыяй. Ну зусім хутка мы вылятаем у Варшаву.

Праз 6 месяцаў пасля трагедыі пад Смаленскам сем’і ахвяр катастрофы ТУ-154 зладзілі пілігрымку на месцы гібелі блізкіх, пазначанае памятным каменем. Людзі пабывалі каля парэшткаў самалёта і ля бярозы, за якую зачапіўся ТУ-154 Леха Качыньскага. Іх суправаджалі жонкі прэзідэнтаў Польшчы - Анна Камароўска і Расіі - Святлана Мядзведзева.

Яцэк Бальцэр, прадстаўнік LOT Polish Airlines, пацвердзіў, што ўдзельнікі паломніцтва мусілі затрымацца ў Віцебску ў сувязі з адмовай стартэра ў Boeing 737. Пасля выпраўлення самалёт быў адпраўлены ў Польшчу, а паломнікі пастанавілі заначаваць у Віцебску, бо вельмі стаміліся.

Яцэк Бальцэр: - Самалёты ў добрым стане. Самалёты авіякампаніі LOT Polish Airlines маюць усе неабходныя сертыфікаты, але ўдзельнікі пілігрымкі вырашылі пераначаваць у Віцебску, каб не ляцець уначы і адпачыць.

Марэк Марцінэк, кіраўнік консульскага аддзелу польскай амбасады ў Мінску, перажываў за землякоў і ўвесь час знаходзіўся ў Віцебску:

Марэк Марцінэк: - Спадзяюся, што ў хуткім часе ўсё паспяхова вырашыцца, мы ўсе вельмі занепакоеныя гэтай сітуацыяй.

Рэпартаж падрыхтаваны з выкарыстаннем матэр'ялаў з http://www.polskieradio.pl/