СААЗ занепакоеная турэмнымі тэрмінамі за захоўванне наркотыкаў у Беларусі

Вячаслаў Гранько​ў / ctv.by
Вячаслаў Гранько​ў / ctv.by

Сусветная арганізацыя аховы здароўя занепакоеная крыміналізацыяй спажывання наркотыкаў у Беларусі. Як лічаць у СААЗ, за ўжыванне наркотыкаў людзей трэба не саджаць у турму, а адпраўляць на лячэнне і рэабілітацыю. Пра гэта на прэс-канферэнцыі ў Мінску заявіў каардынатар праграм па інфекцыйных захворваннях краінавага офіса СААЗ у Беларусі Вячаслаў Гранькоў.

Клопат СААЗ выклікае крымінальны пераслед у Беларусі за захоўванне наркотыкаў для асабістага карыстання. У СААЗ лічаць, што наркаманаў, якія не прадаюць наркотыкі, замест турмы трэба караць адміністрацыйна, лячыць і рэабілітаваць.

Вячаслаў Гранькоў паскардзіўся, што ў Беларусі вельмі размытыя межы паміж колькасцю наркотыкаў для асабістага спажывання і для збыту. Ён прывёў прыклад Партугаліі, дзе выразна прапісана, што не лічыцца замахам на збыт захоўванне наркотыкаў у колькасці да 10-дзённай нормы спажывання для канкрэтнага чалавека.

Акрамя таго, у СААЗ выклікае пытанні прапісаная ў пастанове Саўміна № 1192 ад 2014 года норма аб перадачы інфармацыі аб нарказалежных з Мінздароўя ў МУС і іншыя ведамствы. "Так, мы разумеем, што гэта інфармацыя для службовага карыстання, яна перадаецца па службовых каналах і недаступная грамадскасці. Аднак сам факт перадачы інфармацыі аб спажыўцах наркотыкаў з устаноў аховы здароўя ў органы ўнутраных спраў можа паўплываць на жаданне/нежаданне пацыентаў звяртацца па медыцынскую дапамогу", — растлумачыў Вячаслаў Гранькоў.

Прадстаўнік СААЗ разам з тым адзначыў задавальненне намаганнямі беларускага МУС па супрацьдзеянні наркатрафіку і асабліва адзначыў прыхільнасць Мінздароўя міжнародным стандартам у лячэнні наркатычнай залежнасці.

Апошнія навіны

Галоўнае

Выбар рэдакцыі