"Рэйкавага партызана" асудзілі на 15 гадоў калоніі ўзмоцненага рэжыму
"Рэйкавага партызана" Сяргея Канавалава асудзілі на 15 гадоў калоніі ўзмоцненага рэжыму, паведамляюць праваабаронцы. Крымінальную справу ў закрытым рэжыме разглядаў Віцебскі абласны суд (суддзя — Яўген Буруноў). Прысуд быў агучаны 16 верасня. Канавалава прызналі вінаватым у "наўмысных дзеяннях, накіраваных на ўзбуджэнне нацыянальнай і іншай сацыяльнай варожасці" і ў "падрыхтоўцы да здзяйснення акта тэрарызму і наўмыснаму прывядзенню ў непрыдатны стан сродкаў сувязі". Суд прысудзіў і штраф — 300 базавых (9600 рублёў).
Сяргея Канавалава затрымалі ў сакавіку сёлета за "падрыхтоўку акту тэрарызму". Ён працаваў на Віцебскай дыстанцыі сігналізацыі і сувязі прадпрыемства "Віцебскае аддзяленне Беларускай чыгункі". Па версіі МУС, мужчына хацеў пашкодзіць сістэмы, якія забяспечваюць бяспеку чыгуначнага руху. У ліпені КДБ унёс Канавалава ў "спіс тэрарыстаў". Беларускія праваабаронцы прызналі яго палітвязнем.
Рух "рэйкавых партызан" у Беларусі быў асабліва актыўны ў пачатку расійскай агрэсіі супраць Украіны.
