"Зборы ў школу" каштуюць, як мінімальны заробак (табліца)

120730 Savi4_6kolniki.mp3

Прадаўцы ў ГУМе, дзе ўжо стаяць чэргі з бацькоў і будучых вучняў, заўважаюць, што канцтавары ў цэлым не падаражэлі.

“Кошты ў нас выраслі нязначна. Да прыкладу, сшыткі беларускай вытворчасці выраслі ў кошце літаральна на 50 рублёў”, — кажуць прадаўцы ў аддзеле канцтавараў у ГУМе.

Параўноўваю цэны — яны і сапраўды “не кусаюцца”: самы танны сшытак каштуе, як і ў мінулым годзе, 500-600 рублёў, сшытак лепшай якасці — 900-1000 рублёў, а сшытак з выявамі герояў мультфільмаў — трохі больш за дзве тысячы. На тысячу падаражэлі ручкі і алоўкі, на дзве-чатыры  тысячы выраслі ў коштах пластылін, фарбы, каляровыя алоўкі і папера, альбомы для малявання і клей.

У цэлым жа, на мінімальны набор канцтавараў бацькам трэба выдаткаваць каля 120-150 тысяч рублёў. Амаль столькі ж, колькі і летась.

“Па "канцыляршчыне" не скажаш, што падаражэла”, — заўважае маці дзвюх школьніц Наталля.

Куды больш балюча ўдарыць па бацькоўскім кашальку купля адзення і абутку для школьнікаў — у параўнанні з мінулым годам кошты выраслі мінімум ў два разы!

“Калі ў мінулым годзе я партфель купляла за 80-90 тысяч рублёў, то сёння — мінімум 200 тысяч! Абутак — у два разы, школьная форма таксама. Блузкі для дзяўчынкі таксама падаражэлі — ў мінулым годзе яны каштавалі  прыкладна 80-90 тысяч рублёў, у гэтым годзе — 130-150!”, — гаворыць Наталля.

Першыя выдаткі “на школу” адчула на сабе і маці чацвёртакласніка Дыяна — на школьную форму, туфлі беларускай вытворчасці і кашулю — бацькі ўжо выдаткавалі каля 850 тысяч рублёў. Маці кажа, што ў  асобных выпадках хлопчыкам патрэбна камізэлька, а гэта яшчэ 80-90 тысяч. Дадайце марнаванні на спартовы гарнітур і кеды — плюс 300 тысяч рублёў, калі зэканоміць і купіць не самы дарагі варыянт — і мільён дзвесце як не было!

На дачку-другакласніцу, як падлічвае Дыяна, грошай трэба трошкі менш.

“Дачка Ірына акуратна насіла партфель, ён будзе і на гэты навучальны год, ужо эканомія 200 тысяч. Сарафан для яе каштуе 210 тысяч, а блузка — сотня”.

Маці кажа, што на выдатках можна зэканоміць на ўсім, калі ўсе купляць танней. 

“Можна купіць папку для сшыткаў не за 40 тысяч рублёў, а за 18 кітайскую — вось і эканомія”, — падлічвае маці.

Дыяна заўважае, што на абодвух дзяцей плануе патраціць каля двух мільёнаў. І гэта не ўлічваючы затраты на аплату кніжак для двух дзяцей, свежую стрыжку, букеты кветак на першага верасня і іншыя “непрадказальныя” выдаткі.

Табліца: Асноўныя кошты  на канцтавары