Янукевіч: Выбары прызначаныя на зручны для агітацыі час
Бо ў канцы жніўня і верасні людзі ўжо вяртаюцца з лецішчаў і адпачынкаў.
Старшыня Партыі БНФ Аляксей Янукевіч лічыць, што значна горшым для ўдзельнікаў парламенцкай кампаніі было б прызначэнне выбараў на час восеньскіх дажджоў і зімовых маразоў.
Янукевіч: “Амаль што ўвесь верасень захопліваецца, і гэта нармальна. Таму што самы мёртвы час — гэта жнівень. Можа, апроч апошняга тыдня жніўня. Таму, што тычыцца календара, што асаблівых складанасцяў гэта не стварае. Гэта не мароз 30-градусны. І ў апошні тыдзень жніўня людзі звычайна вяртаюцца ў свае кватэры. І тут, акурат, мы праблем не бачым ніякіх”.
Старшыня Партыі БНФ таксама збіраецца балатавацца на выбарах у дэпутаты парламента. Янукевіч прызнае: у большасці сваёй людзей будзе мала цікавіць палітыка і выбары — незалежна ад сезона. Але палітык спадзяецца, што эканамічныя складанасці прымусяць беларусаў прыслухацца да слоў кандыдатаў.
Фота — belsat.eu
