У падарунак на 40-годдзе Улад Бубен атрымаў уласны трыб’ют
Гэта першы замежны альбом-прысвячэнне беларускаму выканаўцу. У ім узялі ўдзел электроншчыкі з Італіі, Францыі, Бельгіі, Грэцыі, Нарвегіі і Германіі.
Італьянскі лэйбл Tib Productions выдаў трыб’ют заснавальніку беларускай электроннай сцэны Уладу Бубну. Дырэктар лэйбла Даніэль Санціні прапанаваў усім ахвочым зрабіць рэміксы на твор "The House Of My Ancestors" з альбома Бубна “Daloni”, які выйшаў некалькі гадоў таму ў Італіі.
“Я не думаў, што будзе столькі людзей, якія возьмуць удзел, і што Санціні будзе выдаваць гэта як асобны альбом і будзе рабіць дыск, — прызнаецца Улад Бубен, які са здзіўленнем назіраў за ажыятажам вакол лонгплэя ў сацыяльных сетках. — Я вельмі задаволены, таму што гэта сапраўдны сюрпрыз — атрымаць такі падарунак на 40-годдзе”.
Стылістыка трыб’юта блізкая да ambient. Палова музыкаў, што бяруць удзел у складанцы, асабіста знаёмыя з Уладам. Які, дарэчы, прыдзірліва заўважае, што на альбоме не хапае рэміксаў ад арт-суполкі School of a Exist, брэйк-кор-музыкаў і нарвежца Карстана Хамрэ.
Зараз пласцінка дасяжная ў 80 інтэрнет-крамах, пачынаючы ад Amazon. У бліжэйшы час з'явіцца CD-версія трыб’юту, якая таксама будзе распаўсюджвацца праз Amazon.
