У дзень пахавання Святланы Навумавай Някляеву і Дзмітрыеву прызначылі допыт
Уладзімір Някляеў, які знаходзіцца пад хатнім арыштам, праз "ахоўнікаў" перадаў кіраўніцтву КДБ просьбу дазволіць развітацца з калегам і сябрам.
Сёння да канца дня яму перадалі адказ: звяртайцеся ў пісьмовай форме да пракурора.
У Някляева пасля паведамлення пра смерць Святланы Навумавай ўсю ноч была бессань, і сёння, як распавяла Вольга Някляева, у яго зноў падняўся ціск.
Варта адзначыць, што сёння калегу Навумавай па кампаніі "Гавары праўду!" Андрэю Дзмітрыеву прызначылі допыт у КДБ на 12 сакавіка, калі адбудзецца цырымонія развітання са Святланай. У просьбе перанесці яго на іншы дзень было адмоўлена. На заўтра ж запланаваны і допыт Някляева, паведамляе сайт "Гавары праўду!".
